СМІ: Парашэнка ў Мінску прапаноўваў Пуціну "забраць Данбас"
Але расійскі прэзідэнт адмовіўся. Пра гэта піша часопіс Forbes, які спасылаецца на свае крыніцы.
Украінскі прэзідэнт Пётр Парашэнка прапаноўваў расійскаму кіраўніку Уладзіміру Пуціну "забраць Данбас". Гэта, нібыта, здарылася падчас саміта ў Мінску, які прайшоў 11-12 лютага. Як піша часопіс Forbes, пра такую прапанову распавёў сам Пуцін яшчэ 19 сакавіка на закрытай сустрэчы з кіраўніцтвам Расійскага саюза прамыслоўцаў і прадпрымальнікаў.
Неназваная крыніца паведаміла выданню, што прэзідэнт Расіі так пераказаў словы Парашэнкі: "Забірайце Данбас". "Здурнеў, ці што? Мне Данбас не патрэбны. Калі вам не патрэбны, то аб'явіце яго незалежнасць", — адказаў Пуцін.
Паводле іншай крыніцы Forbes, прэзідэнт Украіны прапаноўваў, каб Расія забрала Данбас на сваё фінансавае забеспячэнне. Расійскі прэзідэнт сказаў, што гэта магчыма толькі ў тым выпадку, калі ён стане рэгіёнам Расіі.
Пётр Парашэнка пакуль ніяк гэта не пракаментаваў.
Нагадаем, пасля заключэння перамір'я на Данбасе прарасійскія баевікі працягваюць кантраляваць значныя часткі Данецкай і Луганскай абласцей, дзе яны ўтварылі так званыя "ДНР" і "ЛНР".
Фота: БЕЛТА
