Суд Каларада забараніў Трампу ўдзельнічаць у выбарах
![Дональд Трамп / Reuters](/sites/default/files/styles/gallery_main/public/2023-08/trump_2_08.jpg.webp?itok=RTlmR7sN)
Дональд Трамп / Reuters
Вярхоўны суд штата Каларада забараніў экс-прэзідэнту ЗША Дональду Трампу балатавацца ў прэзідэнты ў гэтым штаце. Пры вынясенні рашэння суд спаслаўся на 14-ю папраўку Канстытуцыі ЗША, яна забараняе грамадзянам займаць дзяржаўныя пасады, калі яны ўдзельнічалі ў мецяжы. Аб гэтым піша CNN. Па дадзеных тэлеканала, забарону на ўдзел Трампа ў выбарах падтрымалі чатыры суддзі, трое выступілі супраць. Пад мецяжом у дадзеным выпадку разумеюцца падзеі 6 студзеня 2021 года, калі прыхільнікі Трампа, якія не прызналі яго паражэнне на выбарах, адправіліся на штурм Капітолія.
Трамп мае намер аспрэчыць гэтую забарону і падаць апеляцыю ў Вярхоўны суд ЗША. Прадстаўнік яго каманды Стывен Чун ужо пацвердзіў, што юрысты будуць дабівацца адмены гэтага "глыбока недэмакратычнага рашэння". Аднак часу ў Трампа няшмат — 5 студзеня заканчваецца тэрмін складання спісаў кандыдатаў для ўдзелу ў праймерыз Рэспубліканскай партыі.
Характэрна, што падобны пазоў аб выключэнні экс-прэзідэнта ЗША з выбарчых бюлетэняў быў пададзены ў некалькіх штатах. Ва ўсіх выпадках заяўнікам выступіла група рэспубліканцаў у супрацоўніцтве з некамерцыйнай арганізацыяй "Грамадзяне за адказнасць і этыку ў Вашынгтоне". У Фларыдзе такі пазоў адхілілі, акруговы суддзя патлумачыў сваё рашэнне тым, што "асобны грамадзянін не мае права аспрэчваць, ці мае іншая асоба права займаць дзяржаўную пасаду".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.