У Асіповічах працякла цыстэрна з салянай кіслатой (фота)

2 красавіка ў 16:19 дзяжурны па чыгуначнай станцыі Асіповічы паведаміў ратавальнікам, што на станцыі выявілі працяканне салянай кіслаты. 

Яна выцякала з цыстэрны з хуткасцю каля 10 літраў у хвіліну. Цыстэрна следавала на станцыю Магілёў-2. 

На станцыю былі накіраваныя падраздзяленні МНС (у тым ліку служба хімічнай і радыяцыйнай абароны), штаб ліквідацыі з Бабрускага гаррайаддзела МНС, спецыялісты цэнтра гігіены і эпідэміялогіі.

На месцы здарэння ратавальнікі пабачылі, што з цыстэрны ёмістасцю 65 кубаметраў працякае канцэнтраваная саляная кіслата. Непасрэдна над месцам цечы былі драты высокага напружання. Таму цыстэрну з салянай кіслатой адлучылі ад цягніка і даставілі ў адстойнік станцыі Асіповічы-3 для ліквідацыі цечы.

Работнікі МНС наклалі на пашкоджанае месца спецыяльны чопік, каб спыніць цечу, а потым на месца пашкоджання — бандаж. Спецыялісты чыгункі з пажарнага цягніка наклалі пенную падушку, каб пралітая кіслата не выпаралася. 

Работнікі службы хімічнай і радыяцыйнай абароны замерылі паветра: перавышэння гранічна дапушчальнай канцэнтрацыі не зафіксавана.

У 18:40 груз быў адпраўлены на станцыю Магілёў-2. Рух цягнікоў на станцыі Асіповічы пры інцыдэнце парушаны не быў, пацярпелых няма.