У "Індэксе чалавечай свабоды" Беларусь за год страціла сем пазіцый
!["Індэкс чалавечай свабоды"](/sites/default/files/styles/gallery_main/public/2023-12/index-2712.png.webp?itok=Amwuzl0F)
"Індэкс чалавечай свабоды" / cato.org
У штогадовым сусветным "Індэксе чалавечай свабоды" Беларусь сёлета займае 133-е месца — разам з Нікарагуа, Марока і Конга.
У параўнанні з 2022 годам наша краіна страціла сем пазіцый — летась яна была на 126-м месцы. Як адзначаюць складальнікі рэйтынгу, за год у Беларусі становішча пагоршылася па ўсіх трох паказчыках — у асабістай, грамадскай і эканамічнай свабодах.
Сярод краін-суседак найлепшы паказчык мае Латвія (15-е месца), за ёй ідуць Літва (17), Польшча (47), Украіна (83) і Расія (121).
"Індэкс чалавечай свабоды" ацэньвае ўзровень свабоды ў розных краінах свету. Яго складае даследчы цэнтр Інстытута Катона (ЗША) разам з аналітычным цэнтрам інстытута Фрэйзера (Канада). Сёлетні Індэкс ацэньвае становішча ў 185 краінах і тэрыторыях, якія ахопліваюць 98,8% насельніцтва Зямлі.
Пры складанні рэйтынгу ўлічваецца 86 паказчыкаў, у тым ліку стан асабістых, грамадзянскіх і эканамічных свабодаў, сітуацыя з бяспекай, свабодай веравызнання, правам на ўласнасць і г.д.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.