Праваабаронцы "Вясны" атрымалі прэмію ААН у галіне правоў чалавека за 2023 год
![Праваабаронцы атрымліваюць прэмію ААН за 2023 год, Алена Маслюкова — трэцяя злева](/sites/default/files/styles/gallery_main/public/2023-12/viasna-2112.jpg.webp?itok=zZ_VKNmz)
Праваабаронцы атрымліваюць прэмію ААН за 2023 год, Алена Маслюкова — трэцяя злева / ААН
Праваабарончы цэнтр "Вясна" стаў адным з лаўрэатаў прэміі ААН у галіне правоў чалавека за 2023 год.
Уручэнне прайшло 15 снежня ў Арганізацыі Аб'яднаных Нацый. Сёлета было пяць лаўрэатаў прэміі — "Вясна", праваабаронца з Дэмакратычнай Рэспублікі Конга Жульен Лусенж, Аманскі цэнтр даследаванняў у галіне правоў чалавека з Іярданіі, актывіст і грамадскі дзеяч з Уругвая Хуліа Перэйра, Глабальная кааліцыя арганізацый грамадзянскай супольнасці, карэнных народаў, грамадскіх рухаў і мясцовых супольнасцяў за ўсеагульнае прызнанне права на чыстае, здаровае і ўстойлівае навакольнае асяроддзе.
Лаўрэатаў прэміі абралі з больш як 400 прэтэндэнтаў, намінаваных ад дзяржаваў-чальцоў, сістэмы ААН і грамадзянскай супольнасці.
"Вясну" на цырымоніі прадстаўляла Алена Маслюкова. У сваёй прамове яна адзначыла, што гэтая ўзнагарода — вялікі гонар для праваабарончага цэнтру і ўсіх беларускіх праваабаронцаў. Яна падкрэсліла, што ў Беларусі працягваецца пераслед людзей паводле палітычных прыкметаў, беларусаў і беларусак катуюць у месцах зняволення, а правы чалавека для дзяржавы не з'яўляюцца каштоўнасцямі.
На гэты момант у Беларусі за кратамі застаюцца пяцёра вясноўцаў — старшыня арганізацыі Алесь Бяляцкі, яго намеснік Валянцін Стэфановіч, юрыст Уладзімір Лабковіч, каардынатарка валанцёрскай службы Марфа Рабкова, валанцёр Андрэй Чапюк.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.