У Мінску паабяцалі не адключаць інтэрнэт падчас чэмпіянату свету па хакеі

13/01/2021 - 17:00

Беларускі Аргкамітэт па правядзенні чэмпіянату свету па хакеі з шайбай 2021 года, мерапрыемства, якое верагодна адменяць ці перанясуць у іншую краіну, выступіў з паведамленнем. У ім заяўляецца, што Беларусь па-ранейшаму гатовая праводзіць ЧС і "забяспечыць у поўным аб'ёме увесь комплекс неабходных мерапрыемстваў, у тым ліку... супрацьэпідэміялагічнага характару, а таксама забяспечыць бяспеку і камфортнае знаходжанне ўдзельнікаў і гасцей". Пра гэта было заяўлена кіраўніку Міжнароднай федэрацыі хакея Рэнэ Фазэлю, які прыязджаў у нашу краіну і сустракаўся таксама з Аляксандрам Лукашэнкам (іх сяброўская сустрэча выклікала шквал крытыкі, у тым ліку на радзіме Фазэля — у Швейцарыі).

У паведамленні аргкамітэта — каментары да пытанняў, якія ўздымаў Фазэль і Міжнародная федэрацыя хакея. У гэтым тэксце ёсць смешныя моманты. Напрыклад, беларускі бок "гарантуе стабільную працу сеткі Інтэрнэт". Як вядома, летась падчас масавых пратэстаў у Беларусі рэгулярна адключаўся інтэрнэт.

Як вядома, старшыня федэрацыі хакея Беларусі Дзмітрый Баскаў летась трапіў у скандальную гісторыю, звязаную з гібеллю пратэстоўца Рамана Бандарэнкі. Баскаў трапіў пад санкцыі Міжнароднага алімпійскага камітэта, да яго мае пытанні і Міжнародная федэрацыя хакея. Аргкамітэт "у якасці жэсту добрай волі" гатовы арганізаваць сустрэчу прадстаўнікоў Дысцыплінарнага камітэта IIHF з... генпракурорам Беларусі. А, як вядома, менавіта Генпракуратура ўжо два месяцы марудзіць з распачаццём крымінальнай справай па факце забойства Бандарэнкі. У паведамленні нагадалі і пра "прэзумцыю невінаватасці".

Таксама ў паведамленні аргкамітэта заяўляецца пра гатоўнасць "да дыялогу як з Латвіяй... так і з любымі іншымі краінамі". А вось прывязванне пытання правядзення ў Беларусі ЧС са зменамі Канстытуцыі ці з арганізацыяй дыялогу з апазіцыяй названае "абсурдным" (пра дыялог Лукашэнку гаварыў і Фазэль). Высвятляецца, што "дыялог" ужо ідзе. А дэлегаты Усебеларускага народнага сходу "выпрацуюць" асноўныя падыходы да змены Канстытуцыі, якія будуць прынятыя на рэферэндуме.

Як вядома, чэмпіянат свету па хакеі Беларусь павінна была правесці ў траўні-чэрвені 2021-га разам з Латвіяй. Аднак апошняя адмовілася ад сумеснага яго правядзення з-за масавых парушэнняў правоў чалавека ў нашай краіне. Заклікі да байкоту ЧС, ці да яго пераносу гучаць з вуснаў спартсменаў, спартыўных функцыянераў, грамадскіх дзеячоў, палітыкаў. Рашэнне Савет Міжнароднай федэрацыі хакея прыме ў канцы студзеня.