У Мінску з’явіцца гурток для дарослых праграмераў?

Поўную версію размовы з Яўгенам можна паслухаць тут 120222 YaugenS.mp3

Еўрарадыё: Вы верыце, што людзей, прывязаных да камп’ютара, можна будзе выцягнуць з іх працоўных месцаў у нейкі "спэйс"?

Яўген: Веру. "Хакерспэйс" — не толькі для праграмістаў, але і для радыёаматараў, для канструктараў, што нешта майструюць па дрэве, па метале. Гэта для тых, каму можа быць цесна займацца гэтым у сваіх кватэрах. Я ў дзяцінстве займаўся ў радыёгуртку. Школьнікі займаліся кожны сваёй справай, майстравалі, досведам дзяліліся. З тае пары ў мяне адчуванне, што чагосьці не хапае. У нас ёсць гурткі для дзяцей, а гуртку для дарослых няма.

Еўрарадыё: Туды будуць прыходзіць людзі са сваімі ноўтбукамі ды моўчкі перапісвацца з кімсьці ў сацыяльных сетках?

Яўген: (Смяецца.) Не. Вось у суботу збіраюцца карыстальнікі свабоднага праграмнага забеспячэння. Калі вы прыйдзеце на гэтую сустрэчу, вы ўбачыце, што людзі і спрачаюцца, і размаўляюць. Гэта не тыя людзі, якія будуць толькі сядзець, утыкаючыся ў свае ноўтбукі, бо гэта не толькі ноўтбук, але і абмен досведам.

Еўрарадыё: Ці разглядаюцца варыянты месца для новага "Хакерспэйса"?

Яўген: Гэта ўсё яшчэ пакуль на ўзроўні ідэі. На мінулым тыдні я толькі падняў гэтую тэму сярод карыстальнікаў свабоднага праграмнага забеспячэння. За тыдзень мы больш-менш узгаднілі, якое павінна быць памяшканне: нейкая майстэрня недалёка ад цэнтру горада. 

Еўрарадыё: Як часта людзі будуць сустракацца?

Яўген: Калі глядзець на падобныя праекты за мяжой, то "спэйс" функцыянуе як клуб, у які кожны з яго ўдзельнікаў можа прыйсці ў любы час. Некаторыя дні могуць быць выдзеленыя пад канкрэтныя тэмы. Часам могуць праводзіцца мерапрыемствы. Гэта будзе “тэхнічнае” месца.

Фота: youcoop.org