У Віцебску падчас заняткаў спортам школьнік атрымаў цяжкія траўмы
Хлопчыка завезлі ў Віцебскую абласную клінічную бальніцу (ілюстрацыйнае фота) / belmedsnab.by
У Віцебску падчас заняткаў спортам школьнік атрымаў цяжкія траўмы. Як паведамляе Міністэрства аховы здароўя, здарэнне адбылося ў Спецыялізаванай дзіцяча-юнацкай школе алімпійскага рэзерву "Камсамолец". Яго падрабязнасці не паведамляюцца. Мінспорту заявіла, што высвятляе абставіны. Пацярпелы — навучэнец аддзялення футбола.
У хлопчыка цяжкая чэрапна-мазгавая траўма, удар галаўнога мозгу і грудной клеткі, пералом асновы чэрапа. "Хуткая" завезла пацярпелага ў Віцебскую абласную клінічную бальніцу, дзе хлопчыка змясцілі ў рэанімацыю. Ён знаходзіцца ў цяжкім стане. За жыццё школьніка змагаюцца лекары.
Увечары ў панядзелак у Віцебску пройдзе рэспубліканскі кансіліум з удзелам вядучых нейрахірургаў, спецыялістаў кафедраў неўралогіі і нейрахірургіі, анестэзіялогіі і рэанімацыі рэспубліканскага ўзроўню. Яго ўдзельнікі разгледзяць пытанне аб прымяненні розных сучасных методык лячэння.
