Віцэ-прэзідэнт IIHF — пра перанос чэмпіянату свету: гэта не палітычнае рашэнне

"Мы не можам гарантаваць бяспеку ў Беларусі, — працягвае Калерва Кумола. — Не можам гарантаваць бяспеку заўзятарам і хакеістам у Мінску".

Віцэ-прэзідэнт Міжнароднай федэрацыі хакея згадаў пра складаную сітуацыю з каранавірусам у Еўропе, а "Беларусь не прадастаўляе дакладныя звесткі пра колькасць хворых". "Мы не ведаем, наколькі цяжкай сітуацыя там будзе ў траўні", — дадаў ён.

Кумола лічыць, што ад пераносу "ніхто не выйграў". "Беларусь — вялікая хакейная дзяржава, — кажа спартыўны функцыянер. — Мне шкада, што сітуацыя складвалася такім чынам, што нам давялося прыняць рашэнне забраць турнір".

Чэмпіянат свету па хакеі мусіў прайсці ў траўні-чэрвені 2021 года ў Беларусі і Латвіі. Рыга адмовілася ад сумеснага правядзення з-за масавых парушэнняў правоў чалавека ў нашай краіне. Дзе ў выніку пройдзе сусветнае першынство, аб'явяць пазней.