"Выбар паміж Лукашэнкам і Лукашэнкам": чаму важна ўдзельнічаць у рэферэндуме

Удзельнічаць у рабоце штаба, акрамя Офіса Ціханоўскай, будуць Каардынацыйная рада, НАУ, платформы "Голас" і "Зубр", ініцыятыва "Сумленныя людзі", аб'яднанне былых сілавікоў. Пры гэтым штаб адкрыты для ўсіх: туды запрашаюць і грамадзян, і іншых палітыкаў, і розныя ініцыятывы. Працуюць і з беларусамі замежжа. Для ўсіх — простая і зразумелая стратэгія:

— Мы заклікаем грамадзян прыходзіць на ўчасткі і рабіць бюлетэні несапраўднымі, перакрэсліваючы ўсе прапанаваныя варыянты, гэта дзеянне неабходна пацвердзіць на платформе "Голас", — дадала Ціханоўская.

Лідарка апазіцыі падкрэсліла: зрабіць бюлетэнь несапраўдным — легальны і даступны кожнаму спосаб выказаць сваё меркаванне.
 

Чаму важна ўдзельнічаць

Сябра прэзідыума КС Вольга Кавалькова адзначыла, што змены, прапанаваныя афіцыйнымі ўладамі, носяць ідэалагічны і фармальны характар, гэта значыць яны не ўлічваюць меркавання значнай часткі грамадства і не спрыяюць спыненню палітычнага крызісу.

— У кароткатэрміновай перспектыве прыняцце прапанаваных зменаў фактычна замарожвае сітуацыю, у сярэднетэрміновай перспектыве стварае перспектывы для новага сур'ёзнага крызісу, — адзначыла яна.

Кавалькова дадала: удзелам у рэферэндуме і падтрымкай кампаніі, абвешчанай дэмакратычнымі сіламі, можна паказаць, што прыхільнікаў пераменаў у краіне большасць.

Яшчэ адну матывацыю ўдзелу агучыў кіраўнік НАУ Павел Латушка. Ён прапануе выкарыстоўваць плебісцыт для "мірнай змены ўлады". Заклікае Латушка, з улікам расійска-беларускіх вучэнняў у лютым, "быць гатовымі да процідзеяння ўмяшанню замежных войскаў ва ўнутраныя справы Беларусі або выкарыстанню як плацдарма для нападу на суседзяў".
 

Байкот — не варыянт?

Распрацоўшчык платформы "Голас" Павел Лібер, як і іншыя ўдзельнікі ініцыятывы, лічыць байкот дрэнным варыянтам паводзінаў у часе рэферэндуму.

— Я думаю, што наш рэжым вельмі чакае пасіўнага байкоту, таму што пасіўнае грамадства — тое, якому прасцей навязаць любыя каштоўнасці. І менавіта таму грамадства павінна быць актыўным, не дазволіць нагнаць сваіх прадстаўнікоў, намаляваць яўку. Таму я заклікаю людзей не сядзець дома.

Лібер нагадаў, што ў "Голасе" ёсць магчымасць выказацца па тэме людзям з усімі поглядамі — і тым, хто будзе выбіраць адзін з варыянтаў, і тым, хто зробіць бюлетэнь несапраўдным, і тым, хто не будзе ўдзельнічаць.