Жлобінец абліў сябе бензінам і пагражаў падпаліць
Ратавальнікі на ўсялякі выпадак эвакуявалі з дому 12 чалавек.
Жлобінскія ратавальнікі 1 жніўня атрымалі паведамленне, што ў мікрараёне №16 мужчына пагражае самагубствам. На месцы здарэння ратавальнікі выявілі, што 53-гадовы жлобінец абліў сябе і маёмасць у кватэры бензінам. Потым ён адчыніў уваходныя дзверы і з запалкамі ў руках сеў у крэсла ў кватэры. Мужчына пагражаў падпаліць сябе і маёмасць.
Ратавальнікі пры дапамозе пажарнага ствала перашкодзілі жлобінцу запаліць запалкі. А потым міліцыянты затрымалі мужчыну.
На выпадак магчымага загарання ратавальнікі эвакуявалі з дома 12 чалавек.
Фота: mchs.gov.by