15:56 Дрэва пакінула Мінск без святла

Старшыня Мінгарвыканкама Міхаіл Паўлаў даручыў правесці расследаванне акалічнасцяў аварыі на электрасетках, якая адбылася 31 сакавіка ў Мінску. Па інфармацыі гендырэктара прадпрыемства “Мінэнерга” Васіля Бабея, прычынай аварыі стала падзенне дрэва пры высечцы ў лесапаркавай зоне. Адбылося кароткае замыканне, і адразу на некалькіх падстанцыях сістэма электразабеспячэння не вытрымала перагрузкі і адключылася.

Вінаватыя ў аварыі - працаўнікі Мінскай лесапаркавай гаспадаркі. Электрычнасць адначасова знікла адразу ў трох раёнах горада - Першамайскім, Партызанскім і Савецкім.

Электразабеспячэнне было адноўлена толькі праз пяць гадзін. Як паведамілі на прадпрыемстве "Мінскія кабельныя сеткі", цяпер вядзецца падлік нанесенай шкоды. Звычайна віной падобных аварый становіцца штармавы вецер або ўраган.