Беларусь у Год культуры можа застацца без кінафэсту "Лістапад"

Адкрытае акцыянернае таварыства "Беларуськалій" адмовілася ад фінасавай падтрымкі Мінскага міжнароднага кінафэсту "Лістапад", піша tut.by. Між тым гэтае прадпрыемства было асноўным партнёрам фэсту.

Да мінімуму зведзеныя і іншыя крыніцы фінансавання, у тым ліку і бюджэтныя. На сёння дырэкцыя можа аплаціць толькі 40% выдатка фестывалю. Па словах намесніцы дырэктара фэсту Раісы Розум, гэтыя грошы далі асноўныя заснавальнікі "Лістапада" — Міністэрства культуры і Мінгарвыканкам. Такіх грошай часткова хопіць на конкурсную праграму і прыезд журы.

Недастатак фінасавання не дазволіць запрасіць гасцей, арганізаваць пазаконкурсныя праграмы і індустрыяльную платформу. А гэта верне "Лістапад" да ранейшага фармату — рэгіянальнага агляду кіно, што не адпавядае статусу міжнароднага фестывалю.

Па словах Раісы Розум, арганізатары атрымалі ўжо 65 адмоваў на афіцыйныя лісты з просьбай аб фінансавай дапамозе фэсту.

Арганізатары ўдакладняюць, што іх бюджэт складае 7-8 мільярдаў рублёў. Напрыклад, бюджэт сёлетняга "Славянскага базару ў Віцебску" наблізіўся да 57 мільярдаў рублёў.