Беларусь застанецца ў зоне свабоднага гандлю з Украінай
![Беларусь застанецца ў зоне свабоднага гандлю з Украінай](/sites/default/files/styles/gallery_main/public/2023-08/ukraina-2812.jpg.webp?itok=w5Ul5H5o)
Беларусь не будзе ўслед за Расіяй выходзіць з зоны свабоднага гандлю з Украінай з 1 студзеня 2016 года. Пра гэта паведамляе УНІАН са спасылкай на гандлёвага прадстаўніка Украіны Наталлю Мікольскую.
У Беларусі зараз знаходзіцца ўкраінская дэлегацыя, якая абмяркоўвае пытанні ўзаемнага гандлю. Як паведамляе прэс-служба МЗС Беларусі, абмяркоўваецца і механізм зняцця абмежавальных мераў ва ўзаемным гандлі. Беларускую частку працоўнай групы ўзначальвае першы намеснік міністра замежных спраў Аляксандр Міхневіч, украінскую — намесніца міністра эканамічнага развіцця і гандлю, гандлёвы прадстаўнік Украіны Наталля Мікольская.
У сваім твітары ўкраінская чыноўніца напісала: "На сустрэчах абмеркавалі ўсе набалелыя гандлёвыя пытанні. Галоўнае — Рэспубліка Беларусь не будзе выходзіць з ЗСГ з Украінай".
Зона свабоднага гандлю існуе ў рамках Садружнасці Незалежных дзяржаў. Расія выходзіць з гэтай зоны ў дачыненні з Украінай з 1 студзеня 2016 года. Гэта патлумачанае тым, што з гэтага часу пачне дзейнічаць гандлёва эканамічны радзел Пагаднення аб асацыяцыі паміж Украінай і Еўрапейскім Саюзам.
Фота: rstk.by