"Беларуськалій" хоча праз суд спагнаць з Літвы мільярд еўра за санкцыі

"Беларуськалій" пачаў арбітражны суд супраць Літвы за адмову транспартаваць угнаенні. Беларускае прадпрыемства выставіла рахунак на адзін мільярд еўра, перадае літоўскі тэлеканал TV3.

Звесткі пра суд пацвярджаюць у міністэрстве транспарту Літвы, але ад каментароў адмаўляюцца, каб не нашкодзіць пазіцыі дзяржавы ў судзе.

Паводле папярэдніх звестак, "Беларуськалій" заяўляе, што Літва парушыла двухбаковае пагадненне аб абароне інвестыцый, падпісанае ў 1999 годзе. У заяўніка дзве прэтэнзіі: скасаванне дамовы пра чыгуначныя перавозкі ўгнаеньняў у Клайпедскі порт, а таксама зніжэнне кошту акцый "Беларуськалію" і тэрміналу насыпных грузаў у Клайпедзе (кошт акцыяў паменшаў у выніку санкцый супраць беларускай кампаніі).

Літва скасавала пагадненне пра перавозку беларускіх калійных угнаенняў з меркаванняў нацыянальнай бяспекі. Перавозкі спыніліся ў лютым 2022 года.

Раней "Беларуськалій" ужо судзіўся з літоўскімі ўладамі, але беспаспяхова. Справа дайшла да Галоўнага адміністратыўнага суда Літвы, які ў снежні 2022-га канчаткова адмовіў прадпрыемству і пастанавіў не аднаўляць справу.