Беларускія турысты, якія трапілі ў ДТЗ у Грузіі, змогуць працягнуць адпачынак

Беларускія турысты, якія трапілі ў Грузіі ў ДТЗ, змогуць працягнуць свой адпачынак у гэтай краіне. Як перадае БЕЛТА са спасылкай на амбасаду Беларусі ў Грузіі, жыццю пасажыраў аўтобуса, які перакуліўся на трасе ў гарах, нічога не пагражае. 25 чалавек атрымалі лёгкія і сярэдняй цяжкасці траўмы, ім аказваюць медыцынскую дапамогу.

Таксама ў амбасадзе ўдакладняюць, што ў аўтобусе знаходзіліся толькі беларускія грамадзяне, прадстаўнікоў іншых краін там не было.

Дарожная аварыя адбылася на перавале Гамборы, на трасе, якая звязвае Тбілісі з горадам Тэлеві. Грузінскія праваахоўнікі распачалі крымінальную справу па факце парушэння правілаў бяспекі руху або эксплуатацыі транспарту, якое пацягнула за сабой нанясенне цяжкай або меней цяжкай шкоды здароўю або значную страту.