Дакументы ў Цэнтрвыбаркам падала Ганна Канапацкая

31 кастрычніка дакументы аб рэгістрацыі ініцыятыўнай групы па зборы подпісаў падала ў Цэнтрвыбаркам Ганна Канапацкая.

Паведамляецца, што яна прынесла дакументы асабіста.

Раней з'яўлялася інфармацыя, што Канапацкая звяртаецца да былых чальцоў Беларускай сацыял-дэмакратычнай партыі (Грамада). У сувязі з гэтым БСДП заклікала сваіх прыхільнікаў у Беларусі ўстрымацца ад удзелу ў ініцыятыўных групах усялякіх кандыдатаў.

Раней Канапацкая ўваходзіла ў апазіцыйную Аб'яднаную грамадзянскую партыю. У 2015 годзе яна стала дэпутаткай Палаты прадстаўнікоў — адзінай з усіх прадстаўнікоў апазіцыйных партый. Праз нейкі час Канапацкая пакінула партыю. У 2020-м вылучалася кандыдаткай на прэзідэнцкія выбары. Падчас выбарчай кампаніі рэзка крытыкавала Віктара Бабарыку і Святлану Ціханоўскую. Паводле афіцыйных звестак яна набрала 1,68% галасоў выбарцаў.

На цяперашні момант ЦВК зарэгістраваў толькі адну ініцыятыўную групу — Аляксандра Лукашэнкі. Адмовы атрымалі Аляксандр Драздоў і Юрый Губарэвіч. Вядома, што падалі дакументы таксама кіраўнікі праўладных партый Алег Гайдукевіч і Аляксандр Хіжняк, а таксама прадстаўніца Беларускага саюза жанчын Вольга Чамаданава (былая прэс-сакратарка МУС).

Прэзідэнцкія выбары прызначаныя на 26 студзеня 2025 года.