Еўрасаюз сёлета ўдвая павялічвае фінансавую падтрымку Беларусі
![Еўрасаюз сёлета ўдвая павялічвае фінансавую падтрымку Беларусі](/sites/default/files/styles/gallery_main/public/2023-08/1044744018afp715.jpg.webp?itok=b-2Lx9ra)
Еўрасаюз сёлета павялічвае ўдвая фінансавую падтрымку Беларусі. Пра гэта паведаміла кіраўніца прадстаўніцтва ЕС у нашай краіне Андрэа Віктарын.
Паводле яе слоў, у 2016 годзе Беларусь атрымае 29 мільёнаў еўра. Сродкі пойдуць на рашэнне праблем, звязаных з міграцыяй, рэгіянальным развіццём і эканамічным развіццём краіны ў цэлым. Яшчэ каля 7 мільёнаў еўра плануецца выдаткаваць на эканамічнае развіццё рэгіёнаў.
"Галоўнае — не лічбы, а арганізацыя супрацоўніцтва паміж мясцовай уладай, грамадзянскай супольнасцю, іншымі партнёрамі з мэтай устойлівага развіцця рэгіёнаў. Важна таксама, каб ініцыятыва развівалася знізу", — цытуе словы Андрэа Віктарын БелаПАН.
31 сакавіка ў мінскім гатэлі "Рэнесанс" прайшла цырымонія падпісання мемарандумаў аб узаемаразуменні паміж Праграмай развіцця ААН і выканкамамі 30 пілотных раёнаў, якія перамаглі ў конкурсным адборы сумеснага праекта Еўрасаюза і ПРААН "Спрыянне развіццю на мясцовым узроўні ў Рэспубліцы Беларусь".