Галоўчанка: уласнасць асобаў з недружалюбных дзяржаў вядомая і падлічаная
Афіцыйны Мінск люстэркава адкажа на факты адабрання беларускай уласнасці за мяжой. Пра гэта заявіў прэм'ер-міністр Раман Галоўчанка пасля нарады ў Аляксандра Лукашэнкі 11 жніўня.
"Нашы меры ў адказ зараз рыхтуюцца. Таксама ўсё будзе цывілізавана. Уся ўласнасць і юрыдычных, і фізічных асоб недружалюбных дзяржаў Рэспубліцы Беларусь вядомая, яна падлічаная", — цытуе БЕЛТА словы кіраўніка ўрада.
Ён назваў крокі супраць Беларусі "агрэсіўнымі дзеяннямі эканамічнага толку".
На сённяшняй нарадзе Лукашэнка заявіў, што ў Беларусі "адціснулі" яе ўласнасць. Гаворка ішла пра тое, што порт у Клайпедзе не перапраўляе беларускія калійныя ўгнаенні, а санаторый "Беларусь" у Юрмале зачыніўся. Усё гэта вынікі заходніх санкцый супраць беларускага рэжыму.
