Гомельскі моладзевы актывіст затрымаў хулігана

Каардынатар Гомельскай абласной суполкі “Маладой Беларусі” Іван Зайцаў 22 верасня апынуўся ў міліцыі, але ж не ў звыклым для апазіцыянера амплуа затрыманага, паведамляе сайт Сильные новости. Моладзевы актывіст сам затрымаў хулігана і даставіў яго ў апорны пункт аховы парадку. Хуліганам быў малады чалавек, які нападпітку чапляўся да прадаўшчыцы ў краме ля вакзала, нецэнзурна лаяўся ды ўсяляк абражаў маладую жанчыну. Іван Зайцаў зрабіў хулігану заўвагу, той на яго напаў. Але ж гомельскі апазіцыянер выявіўся спартсменам і таму адужаў парушальніка парадку.

Праўда, міліцыя ніякіх працэсуальных дзеянняў супраць вінаватага ўжываць не стала. Паабяцалі “проста прэсануць, каб непанадна”.