ГУБАЗіК прыйшоў да мужчыны, які ў TikTok паскардзіўся на кепскія дарогі
Мужчына, затрыманы за ролік у TikTok / тэлеграм-канал сілавікоў
Супрацоўнікі ГУБАЗіКа затрымалі жыхара Віцебскай вобласці, які апублікаваў у TikTok ролік са скаргай на дрэнныя дарогі. Відэа з ім з'явілася 29 красавіка ў тэлеграм-канале сілавікоў, заўважыла "Зеркало".
Мужчына зняў ролік пра кепскія дарогі паміж сельскімі населенымі пунктамі. Відэа ён апублікаваў у сваім акаўнце ў TikTok. Потым гэты ролік перапосціў адзін з рэсурсаў, які беларускія ўлады прызналі "экстрэмісцкім" — і аўтарам зацікавіліся міліцыянты.
Аўтара відэа праверылі на "экстрэмізм", а потым да яго прыйшлі з ператрусам. "На шчасце мужчыны, яго відэаролік трапіў у экстрэмісцкія супольнасці без яго ведама, таму аўтар абышоўся "лёгкім спалохам", — заяўляюць у тэлеграм-канале сілавікоў.
Мужчыну прымусілі сказаць на відэа, што па ўсіх праблемных пытаннях "варта звяртацца ў дзяржорганы", а не выкладваць відэа ў TikTok і "ўсякія розныя астатнія каналы".
