Кнігу са “скандальным інтэрв’ю” падарылі Лукашэнку яшчэ ў лютым

“Інтэрв’ю” Аляксандра Лукашэнкі, якое з’явілася 18 чэрвеня на сайце выдання “Известия.ua”, займела міжнародны рэзананс. Беларускія СМІ расцягнулі яго на цытаты, а за словы, нібыта сказаныя кіраўніком Беларусі пра дрэннае жыццё ў Нагорным Карабаху, перад армянскімі калегамі давялося апраўдвацца беларускаму МЗС.

“Згодна з атрыманай ад Міністэрства замежных спраў Беларусі інфармацыяй, прэзідэнт Беларусі Аляксандр Рыгоравіч Лукашэнка заяў з такімі фармулёўкамі не рабіў. Больш за тое, падчас афіцыйнага візіту ва Украіну прэзідэнт Беларусі інтэрв’ю выданню “Известия в Украине” не даваў”, — заявіў агенцтву “Новости-Армения” намеснік міністра замежных спраў Арменіі Шаварш Качаран.

“А якія ў вас ёсць падставы меркаваць, што ён (намеснік міністра замежных спраў Арменіі Шаварш Качаран. — заўв. Еўрарадыё) хлусіць?” — гаворыць Еўрарадыё у адказ на ўдакладненне сітуацыі з “інтэрв’ю, якога не было”, кіраўнік прэс-службы МЗС Беларусі Андрэй Савіных.

Дык што ж гэта насамрэч было, цікавіцца Еўрарадыё ў аўтара матэрыялу, галоўнага рэдактара “Известия в Украине” Яніны Сакалоўскай.

Еўрарадыё: Усе палічылі, што гэта — інтэрв’ю, якое кіраўнік Беларусі даў вашаму выданню падчас свайго знаходжання ў Кіеве…

Яніна Сакалоўская: Там жа напісана, што гэта — падчас сустрэчы з Клубам рэдактараў, раней. Мы яго проста перадрукавалі — у нас яно выходзіла, здаецца, у снежні. Я не ведаю, чаму так яго ўспрынялі.

Еўрарадыё: Тады і фармулёўка: “інтэрв’ю, якога не было”, адпавядае рэчаіснасці — гэта не інтэрв’ю у звыклым яго выглядзе?

Яніна Сакалоўская: Ну, там жа напісана, што гэта — сустрэча з Клубам галоўных рэдактараў.

Еўрарадыё: Усё тое, што ўвайшло ў гэты матэрыял, было сказана кіраўніком Беларусі ў прысутнасці ўсіх удзельнікаў той сустрэчы, у вас не было эксклюзіўнай размовы з ім недзе ў кулуарах?

Яніна Сакалоўская: Такой размовы не было. Яшчэ раз кажу: мы проста паўтарылі адзін і той жа матэрыял. Рэч у тым, што ў нас перарабляўся сайт, і яно зляцела з сайту. Вось мы і паўтарылі яшчэ раз, каб людзі пачыталі. І чамусьці тады, у снежні, ніхто на гэты матэрыял не крыўдзіўся — у амбасады мы гэтую газету адпраўлялі. Я не ведаю, чаму яны зараз крыўдзіцца пачалі. Больш за тое — ён (матэрыял-“інтэрв’ю” з Аляксандрам Лукашэнкам. — Еўрарадыё) выйшаў у адмысловай кнізе па Беларусі, якую мы рабілі ў РИА “Новости”. І якую мы падарылі прэзідэнту яшчэ, здаецца, у лютым.

Еўрарадыё: Дакладна матэрыял ад 18 чэрвеня слова ў слова паўтарае і матэрыял, які выйшаў у вас у снежні, і тое, што трапіла ў кнігу?

Яніна Сакалоўская: Канешне! Усё ёсць у кнізе, а кніга ёсць у прэзідэнцкай адміністрацыі!

Еўрарадыё: Калі што, вы можаце пацвердзіць свой матэрыял нейкім аўдыёзапісам, дзе б выкладзеныя там словы кіраўніка Беларусі былі агучаныя яго голасам?

Яніна Сакалоўская: Вы можаце звязацца з Захарам Вінаградавым, каардынатарам Клуба (Клуб галоўных рэдактараў СНД, Грузіі і Балтыі. – заўв. Еўрарадыё) — у яго ёсць запіс.

Еўрарадыё параўноўвае словы Аляксандра Лукашэнкі наконт Нагорнага Карабаху, нібыта сказаныя ім падчас той сустрэчы рэдактараў. Вось як падаюць гэтую тэму “Известия в Украине”:

“Я неяк прыехаў на запрашэнне сваіх сяброў у горы да іх, паказвалі мне іх, я распачаў тэму з чыста беларускім падыходам. Нагорны Карабах, што ён уяўляе, як там жывуць людзі, дзе працуюць. Там жа нармальнага жыцця няма. Я зразумеў, што гэтую праблему трэба вырашаць”.

А вось выказванні на тую ж тэму кіраўніка Беларусі ў адказ на пытанне старшыні рэдакцыйнага савета армянскай газеты “Иравунк”, дэпутата Айка Бабуханяна, якія цытуе “Народная воля”:

“Я неяк прыехаў на запрашэнне маіх сяброў, а там у мяне сяброў шмат  — гэта і прэзідэнт Серж Азатавіч, і Гагік Царукян, і Роберт Качаран — гэта мае сябры, ну і я паляцеў туды, тым больш, там адчынялі гандлёвы дом. Прыляцеў і пачаў з Сержам Азатавічам гэтую тэму, запытаўся — як жывуць людзі ў Нагорным Карабаху, ці працуюць яны, адчуваюць сябе спакойна. Ён адказаў: ды не, ну пра што ты кажаш. Я сказаў, што гэтую праблему трэба развязваць”.

Пагадзіцеся, розніца ў цытатах адчувальная. І не толькі ў тых, якія тычыцца Нагорнага Карабаху…
 

Фота: n1.by, Змітра Лукашука