Латвія забараніла ўвоз сельгаспрадукцыі з Беларусі і Расіі

Латвія забараніла ўвоз сельгаспрадукцыі з Беларусі і Расіі. 22 лютага Сейм прыняў папраўкі да закона аб сельскай гаспадарцы і развіцці сельскіх раёнаў. Яны ўстанаўліваюць забарону на ўвоз сельскагаспадарчых і кармавых прадуктаў з РБ і РФ для спажывання ў Латвію. Цяпер чакаецца, што ўрад выдасць адпаведную пастанову са спісам канкрэтных тавараў. 

Прэс-служба латвійскага парламента адзначае, што гэтыя папраўкі сталі альтэрнатывай законапраекту, прадстаўленаму групай дэпутатаў. Яны заклікалі ўвесці забарону на расійскую і беларускую прадукцыю не толькі ў Латвіі, але і ў іншых дзяржавах-членах Еўрасаюза. Згодна з папраўкамі, беларускую і расійскую сельскагаспадарчую прадукцыю нельга будзе ўвезці ў Латвію і з трэціх краін.

Вядома, што за першыя 10 месяцаў 2023 года расійскі імпарт сельскагаспадарчай і кармавой прадукцыі ў Латвію склаў 280 мільёнаў еўра. У асноўным гэта былі кармы, крупы, гарох і рапсавы алей. Не дзіўна, што пратэставалі латвійскія фермеры.

Адзначаецца, што новаўвядзенне — гэта "дадатковы элемент агульнай санкцыйнай палітыкі", якая праводзіцца ЕС у адказ на агрэсію Расіі супраць Украіны. Латвія першай у ЕС забараніла пастаўкі сельгаспрадукцыі з Беларусі і РФ. Забарона будзе дзейнічаць да лета 2025-га.