Мастаку-палітвязню Алесю Пушкіну збіраюцца ўзмацніць пакаранне

Палітзняволенага мастака Алеся Пушкіна збіраюцца пераводзіць на турэмны рэжым, паведамляе праваабарончы цэнтр "Вясна".

Пушкін асуджаны на 5 гадоў калоніі строгага рэжыму. Пакаранне ён адбывае ў івацэвіцкай калоніі "Воўчыя Норы". Адміністрацыя калоніі вырашыла ўзмацніць яго пакаранне.

Суд па замене рэжыму прызначаны на 11 лістапада. Рашэнне будзе прымаць суддзя Аляксандр Кірыловіч, які нядаўна ўзмацніў пакаранне палітвязню Сцяпану Латыпаву.

Дарэчы, у жніўні адміністрацыя калоніі №22 пакарала Пушкіна пяццю месяцамі ў ПКТ (памяшканне камернага тыпу).