Мінэнерга назвала фэйкам звесткі пра апрамяненне персаналу на БелАЭС
Беларуская АЭС / Еўрарадыё
У Міністэрстве энергетыкі абвяргаюць звесткі пра апрамяненне персаналу Беларусай АЭС.
"Інфармацыя аб апрамяненні персаналу на БелАЭС, якая з'явілася ў асобных тэлеграм-каналах, не адпавядае рэчаіснасці. Шматузроўневыя сістэмы аўтаматычнай абароны, якія дзейнічаюць на станцыі, забяспечваюць бяспечную працу персаналу і выключаюць магчымасць радыяцыйнага ўздзеяння ў зоне кантраляванага доступу вышэй за дапушчальныя нормы", — заяўляюць у Мінэнерга.
Як распавядала Еўрарадыё, інцыдэнт на БелАЭС здарыўся ў другой палове красавіка. Па часе інцыдэнт супаў з пачаткам "планава-папераджальнага рамонту", калі першы блок АЭС быў адключаны на паўгода.
У Мінэнерга заяўляюць, што ўсе работы на АЭС праводзіліся ў адпаведнасці з нормамі: "Усе работы ў рамках планава-папераджальнага рамонту, у тым ліку частковая перагрузка свежага ядзернага паліва на першым энергаблоку БелАЭС, праводзіліся са строгім захаваннем устаноўленых нагляднымі органамі патрабаванняў і міжнародных нормаў".
