Мінкульт і Мінінфарм вырашылі, што Алексіевіч не заслугоўвае звання героя

Пры гэтым “Героямі Беларусі” сталі 3 старшыні калгасаў, 2 дырэктары прадпрыемстваў і адзін кіраўнік творчага калектыву.

“Званне "Герой Беларусі" з'яўляецца найвышэйшай ступенню адзнакі Рэспублікі Беларусь і прысвойваецца за выключныя заслугі перад дзяржавай і грамадствам, звязаныя з подзвігам, здзейсненым у імя свабоды, незалежнасці і працвітання Рэспублікі Беларусь. У сувязі з гэтым С. А. Алексіевіч у дадзены час не можа быць прадстаўленая да прысваення звання “Герой Беларусі”, — такі адказ атрымаў грамадскі актывіст Уладзь Сташкевіч з Міністэрства культуры, куды звяртаўся з прапановай прадставіць Алексіевіч да прысваення звання “Герой Беларусі”.

Звяртаўся не адзін — сабраў ажно 334 подпісы. Мінкульт над прапановай думаў 31 дзень і адмовіў. Паведаміўшы пры гэтым, што параіўся таксама з калегамі з Міністэрства інфармацыі, а таксама з прадстаўнікамі “Саюза пісьменнікаў Беларусі”.

“Ініцыятыва таму з’явілася, што ў Святланы Алексіевіч няма дзяржаўнага прызнання, няма дзяржаўных узнагародаў. І вось мы падумалі, што народ таксама можа ініцыяваць прысуджэнне ёй звання. І гэта добра магло б выглядаць, калі такая ініцыятыва ідзе ад людзей”, — тлумачыць Еўрарадыё сваю ідэю Уладзь Сташкевіч.

Подпісы збіралі з дапамогай сайта petitions.by, там жа знайшоўся юрыст, які мог кантраляваць правільнасць падачы. Кожны падпісант указваў свае рэальныя імя і прозвішча, хатні адрас. Сташкевіч расказвае, што падрабязна вывучыў, хто і за што рабіўся ў Беларусі афіцыйным героем. Вялікіх перашкодаў прысудзіць такое званне Святлане Алексіевіч не знайшоў.

“Хто ў нас атрымліваў гэтае званне? Гэта 11 чалавек. І там, у прынцыпе, большая частка атрымала званне “Герой Беларусі” за дасягненні ў сельскай гаспадарцы, машынабудаўніцтве. У некаторых проста стаіць “за працу ў калгасе”. Подзвігаў там асаблівых не праглядваецца”, — расказвае актывіст.

Але ў Мінкульце лічаць іначай. Сташкевіч, праўда, спыняцца не хоча. Абяцае весці перапіску з чыноўнікамі пра Алексіевіч, пакуль не атрымае больш дакладны адказ.

Хто і за што станавіўся “Героем Беларусі”:

1. Уладзімір Карват, лётчык — званне атрымаў пасмяротна. Загінуў, спрабуючы адвесці свой самалёт, які падаў, ад вясковых дамоў.

2. Павел Марыеў, дырэктар “БелАЗа” — званне атрымаў “за працу на прадпрыемстве БелАЗ”.

3. Аляксандр Дубко, кіраўнік Гродзенскага аблвыканкама — “за развіццё сельскай гаспадаркі ў Гродзенскай вобласці”.

4. Міхаіл Карчміт, старшыня агракамбіната “Сноў” — “за ўклад у развіццё сельскай гаспадаркі Нясвіжскага раёна Мінскай вобласці, а таксама за працу ў Камісіі па рэгіянальнай палітыцы Савета Рэспублікі Нацыянальнага сходу Рэспублікі Беларусь”.

5. Віталь Крамко, старшыня сельскагаспадарчага прадпрыемства “Кастрычнік” — “за працу ў калгасе "Прагрэс" і СВК "Кастрычнік-Гродна" Гродзенскага раёна Гродзенскай вобласці”.

6. Міхаіл Высоцкі, дырэктар “Белаўтатрактарабудаўніцтва” НАН Беларусі — “за ўклад у развіццё аўтамабілебудавання”.

7. Пётр Пракаповіч, старшыня Нацбанка — “за працу ў банкаўскай сістэме”.

8. Васіль Равяка, старшыня сельскагаспадарчага кааператыва “Прагрэс-Верцялішкі”, — “За працу ў СВК "Прагрэс — Верцялішкі”.

9. Міхаіл Савіцкі, кіраўнік дзяржаўнай установы культуры “Творчыя акадэмічныя майстэрні жывапісу, графікі і скульптуры” — “за развіццё беларускага жывапісу”.

10. Філарэт, Мітрапаліт Мінскі і Слуцкі, Ганаровы Патрыяршы Экзарх усяе Беларусі — “за выключны асабісты ўклад у духоўнае адраджэнне беларускага народа”.

11. Дар’я Домрачава, біятланістка — “за здзяйсненне спартыўнага подзвігу (трохразовая алімпійская чэмпіёнка)”.

Фота nn.by