Мінлясгас напамінае: не сячыце елачкі, танней купіць

Супрацоўнікі лясгасаў перайшлі на ўзмоцнены варыянт нясення службы, піша тэлеграм-канал Міністэрства лясной гаспадаркі. Сачыць будуць, вядома, за “навагоднімі дрэвамі” — елкамі, хвоямі і іншымі.

“Прафілактычныя рэйды супрацоўнікі лясгасаў плануюць праводзіць рэгулярна. Парушальнікам пагражае штраф да 870 рублёў”, — напамінаюць у міністэрстве.

Верым, што гэты аргумент пераканаў вас не ісці ў лесу з сякерай, і напамінаем, калі пачнуць працаваць елкавыя кірмашы.

Першыя кірмашы адкрыліся ўжо на гэтых выходных у некаторых рэгіёнах Брэсцкай вобласці. З 20 снежня елкавыя кірмашы пачнуць адкрывацца ў Віцебскай, Гарадзенскай і Мінскай абласцях, з 21 снежня - у Магілёўскай, з 22 снежня - у Гомельскай вобласці і ў горадзе Мінску.

У Мінску лясгасы будуць прадаваць дрэвы ў двух месцах: па адрасах вул. Баграціёна, 70  і вул. Прытыцкага, 146. Усе іншыя месцы продажу — вотчына індывідуальных прадпрыемцаў.

Адрасы і рэжым працы елкавых кірмашоў, а разам з тым і цэны на ялінкі рознага ўзросту можна ўдакладніць на сайце Мінлясгаса.