Ордар на арышт Лукашэнкі: калі чакаць і што гэта зменіць

19/07/2023 - 13:08

Лукашэнка можа скласці кампанію Пуціну і атрымаць ордар на арышт ад Міжнароднага крымінальнага суда / Еўрарадыё, калаж Улада Рубанава

Лукашэнка можа скласці кампанію Пуціну і атрымаць ордар на арышт ад Міжнароднага крымінальнага суда / Еўрарадыё, калаж Улада Рубанава

Еўрапарламент заклікаў Міжнародны крымінальны суд выдаць ордар на арышт Аляксандра Лукашэнкі. Адна з прычын — незаконны вываз украінскіх дзяцей. На думку палітычнага аналітыка Арцёма Шрайбмана, Лукашэнка цалкам можа атрымаць ордар следам за Пуціным. А палітолаг Валер Карбалевіч адзначае, што да гэтага яшчэ далёка.

Еўрарадыё даведалася, што можа перашкодзіць выдачы ордара і што будзе, калі ён усё ж з'явіцца.

Трэба, каб Лукашэнка прагаварыўся?

Ордер на арест Лукашенко: когда ждать и что это изменит

Лукашэнка варта было б часцей знаходзіцца ў такім становішчы / kommersant.ru

У прапанове Еўрапарламента няма нічога нерэальнага, бо Міжнародны крымінальны суд ужо выдаваў ордар на арышт кіраўнікоў дзяржаў, адзначае Арцём Шрайбман.

— Тут ёсць некалькі тэхнічных момантаў. Не складана вызначыць ролю Лукашэнкі ў агрэсіі. Па гэтым злачынстве можна было б выдаць ордар, таму што ён сам шмат разоў казаў пра свой саўдзел у вайне. Але так ужо здарылася, што статут Міжнароднага крымінальнага суда ў гэтай сваёй частцы не распаўсюджваецца на падзеі ва Украіне. Бо ні Украіна, ні Беларусь, ні Расія не ратыфікавалі гэты статут.

— Многія апазіцыйныя і міжнародныя структуры гэта лабіруюць. Але тут пытанне, ці дастаткова доказаў для Міжнароднага крымінальнага суда, што Лукашэнка браў у гэтым прамы ўдзел. Я не ўпэўнены, бо ў іх вельмі высокі стандарт для даказвання. Выдаць ордар на арышт Пуціна яны змаглі толькі пасля таго, як ён прызнаўся па тэлевізары, — працягвае Арцём Шрайбман. — Таму што, мабыць, пракурор не ўпэўнены, што зможа цалкам пераканаўча даказаць, што менавіта Пуцін прымаў канкрэтныя рашэнні па кожнай ракеце.

Мы пакуль не бачылі доказаў, дастатковых для Міжнароднага суда, што Лукашэнка асабіста камандаваў вывазам дзяцей. Пытанне, ці з'явіцца гэта ў будучыні. Цалкам магчыма, што нешта накапаюць расследвальнікі, апазіцыянеры, можа, Лукашэнка скажа нешта, што яго інкрымінуе. Але пакуль я публічна такога не бачыў — і, адпаведна, пакуль мы не бачым гэтага ордара.

Спачатку трэба разабрацца ў Еўрапарламенце

Валер Карбалевіч мяркуе, што да ордара яшчэ далёка.

— Камітэт па замежных справах Еўрапарламента падрыхтаваў даклад, у якім ацэньваецца сітуацыя з правамі чалавека ў Беларусі і падтрымка Беларуссю агрэсіі супраць Украіны, пра ўкраінскіх дзяцей, якія вывозіліся ў Беларусь. І гэты даклад, наколькі я разумею, павінен зацвердзіць Еўрапарламент у цэлым.

Гэты самалёт, на якім лётаў Лукашэнка, выставілі на продаж. Можа, і іншы давядзецца / airliners.net

Калі ордар усё ж будзе выдадзены, то наўрад ці гэта нешта глабальна зменіць, але ўзмоцніць ізаляцыю Лукашэнкі, сыходзяцца ў меркаванні эксперты.

— Гэта хутчэй палітычна-псіхалагічны ціск. Беларусь і так у ізаляцыі. Не так ужо і шмат Лукашэнка ездзіць. Таму, думаю, што ўсё гэта хутчэй псіхалагічныя пужалкі, — кажа Валер Карбалевіч.

Па сутнасці, Лукашэнка проста яшчэ менш будзе падарожнічаць.

— Многія краіны, якія ратыфікавалі гэты статут, не змогуць яго прыняць. І, у адрозненне ад выпадку з Пуціным, думаю, ніхто нават не будзе сур'ёзна, як ПАР, мітусіцца.

У астатнім гэта не моцна нешта мяняе, бо Лукашэнка і так у цэлым ізаляваны на Захадзе. Гэта заблакуе яму яшчэ дадаткова магчымасці з гэтай ізаляцыі выйсці ў будучыні. Таму што такія ордары не здымаюцца. Ён навечна застанецца чалавекам, абвінавачаным у ваенных злачынствах, — заключае Арцём Шрайбман.