Падрабязнасці масавых ператрусаў у Мінску, звязаных з дзейнасцю КР

Зранку праваабаронцы паведамілі пра масавыя ператрусы ў Мінску.

— Ператрусы адбываюцца па месцы рэгістрацыі і прапіскі чальцоў Каардынацыйнай Рады — як публічных, так і не публічных — альбо ў іх сваякоў, — патлумачылі Еўрарадыё ў прэс-службе КР.

Адзін з прадстаўнікоў КР, кіраўнік руху “За Свабоду” Юрый Губарэвіч напісаў на сваёй старонцы ў Facebook, што сілавікі прыходзілі і па месцы яго прапіскі.

“Ведаючы бандыцкую сутнасць гэтага рэжыму, усё распрадаў яшчэ да канца 2021 года”, — напісаў Губарэвіч.

Праўладныя тэлеграм-каналы назвалі гэтыя ператрусы “папярэднім этапам падрыхтоўкі да выбараў у "Каардынацыйную раду".

Калі ўлады пачалі новы віток рэпрэсій, канчатковае рашэнне пра правядзенне выбараў у КР яшчэ нават не было прынятае. З пытаннем пра тое, чаму ўлады спужаліся гэтых сімвалічных выбараў, Еўрарадыё звярнулася да спікера Рады Андрэя Ягорава.

— Так, улады відавочна лічаць выбары ў КР сур’езным выклікам для іх. З усіх магчымых вектараў атакі па тэме выбараў, яны першым абралі менавіта альтэрнатыўныя выбары. Нават разумеючы, што КР і ўсе дэмакратычныя сілы ўнутры Беларусі маюць значэнне толькі як сімвалы супраціву і не маюць рэальнай улады, яны апасаюцца любой альтэрнатывы.