"Песня ў фармаце "Еўрабачання" ніколі не перамагае на "Еўрабачанні"

Напярэдадні нацыянальнага адбору на "Еўрабачанне 2018" у студыю Еўрарадыё прыйшлі кампазітар і прадзюсар Макс Алейнікаў і журналіст "Камсамольскай праўды ў Беларусі" і ўдзельнік журы сёлетняга адбору Сяргей Маліноўскі. Разважаем, чаму нашы зоркі сталі купляць песні на конкурс у замежных аўтараў, ці патрэбнае галасаванне гледачоў у фінале адбору і хто прынясе Беларусі доўгачаканую перамогу.

"Для таго, каб выбіраць лепшае з лепшага, трэба ў лепшым арыентавацца"

Маліноўскі: Тое, што беларускія артысты звярнуліся да замежных аўтараў, кажа пра няўпэўненасць ва ўласных сілах. Цяпер у прэс-рэлізах модна падкрэсліваць, што трэк напісаў аўтар песні Шэрыфавіч і гэтак далей. Гэта значыць, чым больш пафасу, тым гэта павінна выклікаць большы аўтарытэт у слухачоў. Не ведаю, ці спрацуе такое. Ёсць, я так разумею, архівы песень, куды вядомыя аўтары выкладваюць свае трэкі, і ты можаш купіць іх ці не купіць. Але, відавочна, яны выкладваюць не лепшыя песні, лепшыя прапануюць вядомым артыстам. З таго, што я слухаў, я не пачуў ні адной песні, годнай "Еўрабачання".

Алейнікаў: Але пытанне не ў аўтары, выкладвае ён лепшае ці горшае, пытанне ў выканаўцы, які купляе. Для таго каб выбіраць лепшае з лепшага, трэба ў лепшым арыентавацца. А мяркуючы па тым, што выбіраюць нашы артысты, праблема ў арыентаванні ёсць. Справа ў няправільна пастаўленых мэтах. Гэта значыць, калі б людзі, якія выбіраюць сабе песню, выбіралі яе для таго, каб выйграць "Еўрабачанне", яны б яшчэ раз падумалі.

"Мы можам выехаць за кошт іроніі або чагосьці вельмі незвычайнага і самабытнага"

Маліноўскі: Мы не зробім еўрапейскі хіт, таму што знаходзімся не ў авангардзе музычнага марафону. Мы можам выехаць за кошт іроніі або чагосьці вельмі незвычайнага і самабытнага. Пакуль у нашым адборы я гэтага не бачу... Калі б я быў Белтэлерадыёкампаніяй, мне было б вельмі важна зрабіць цікавы канцэрт, маю на ўвазе фінал, такой, каб яго глядзелі. Гэта значыць, я б сабраў не правільных артыстаў з правільнымі песнямі, а зусім разнапланавых, каб было, пра што спрачацца. З гэтага пункту гледжання, я цалкам спакойна выберу 15 артыстаў, якія могуць удзельнічаць у фінале, але я ж не адзін у журы.

Алейнікаў: Ёсць два варыянты развіцця падзей. Альбо знаходзіцца нейкая нябачаная фішка, а можа, і не адна, альбо чалавек, які за кошт сваёй энергіі зможа гэтую сцяну праламаць. Але ў абодвух выпадках патрэбная трапная песня. Трапная, не значыць еўравізійная, а трапная для гэтай падзеі. Ёсць умоўны фармат "Еўрабачання", гэта значыць, можна сказаць, што сярэднестатыстычная песня вось такая. Але вось такая песня ніколі не перамагае. І рабіць яе сэнсу няма. І калі я слухаю набытыя сёння песні, я разумею, што яны не перамагаюць. Нашы артысты не разумеюць гэтага, таму што ў іх няма мэты перамагчы, а ў лепшым выпадку, паўдзельнічаць у фінале нацыянальнага адбору. Але дрэннага ў тым, што нейкія выканаўцы купляюць песні ў замежных аўтараў, няма, таму што ў рэшце рэшт, на нашай эстрадзе з'явіцца некалькі якасных трэкаў.

"Чаму еўрапейская публіка не будзе балдзець ад Саладухі гэтак жа, як і мы?"

Алейнікаў: Не бачу сэнсу прадаваць свае песні, каб нехта выйшаў на нацыянальным адборы і ўсе сказалі: "Ну, прыгожая песня". Такое ўжо было. На сённяшні дзень я не хачу такіх варыянтаў. Калі цяпер нешта пішу, то пішу з разуменнем, што гэта можа перамагчы.

Маліноўскі: Мала добрую песню адправіць. Трэба адправіць артыста, якога ў нас рэальна любяць, які цікавы нашым гледачам. Мы нядаўна абмяркоўвалі, каго паклікаць на карпаратыў. Узнікае толькі два імя: Дзіма Вайцюшкевіч і Саладуха. Усё.

Алейнікаў: Фрык на "Еўрабачанні" — гэта лепш, чым фолк. Гэта больш даступна і зразумела ўсім.

Маліноўскі: Саладуха бясконца катаецца па Беларусі. Яго любяць. Я бачыў, як публіка, якая першапачаткова была настроеная да яго скептычна, потым балдзела на яго канцэртах. Чаму няма? Чаму еўрапейская публіка не будзе балдзеть гэтак жа?.. А вось "Троіцы" на "Еўрабачанні" трэба ехаць разам з Гюнэш. "Троіца" занадта камерная. Трэба браць нейкую дынамічную песню, і каб Кірчук быў не асноўным вакалістам — ён вельмі каларытны, у яго клёвы голас, але яму трэба быць на бэк-вакале. А спераду ставіць кагосьці больш рухавага, маладзейшага, які будзе прыцягваць увагу да сябе.

"Слухайце, чым мы займаемся, калі для нас 16-е месца — гэта добра ?!"

Маліноўскі: Мы занадта сур'ёзна ставімся да "Еўрабачання". Гэта не "Славянскі базар". Тут не патрэбныя супермегавакальныя дадзеныя, хоць гэта таксама важна.

Алейнікаў: Не згодны. Што значыць, занадта сур'ёзна? Калі б мы да яго ставіліся сур'ёзна, мы, напэўна, ужо б дасягалі большага. Таму што сур'ёзнае стаўленне — гэта аналіз, гэта зусім іншая праца, гэта іншыя мэты. У іншых краінах адбор на "Еўрабачанне" праводзіцца для таго, каб выйграць, а не для таго, каб паўдзельнічаць. А мы кожны раз гадаем, увойдзем у фінал ці не. Увайшлі. О! Вынік! Слухайце, чым мы займаемся, калі для нас 16-е месца — гэта добра?!

"Кінуў сябрам тысячы паўтары долараў, яны сядзелі і галасавалі. Гэта спаборніцтва тых, у каго цяпер ёсць грошы і хто гатовы іх патраціць"

Маліноўскі: Аляксееў — самае вядомае імя ў нашым адборы. І хоць бы таму за яго будуць галасаваць Расія, Украіна і Беларусь. І ў нашым адборы — прыхільніцы.

Алейнікаў: У дзяўчынак цяпер грошай няма. Адна справа, прыйсці і паглядзець на яго ўжывую, а іншая — са свайго тэлефона дасылаць грошы. Гэта розныя рэчы. У мінулым годзе я забаўляўся "Еўрабачаннем" і вельмі несур'ёзна да яго паставіўся. Але тым не менш, у апошні момант за тры гадзіны да мерапрыемства вырашыў, што ай, усё-ткі прагаласую. Кінуў сябрам тысячы паўтары долараў, яны сядзелі і галасавалі. Я зусім сумленна гэта кажу. У гэтым галасаванні няма сэнсу. Гэта спаборніцтва тых, у каго цяпер ёсць грошы і хто гатовы іх патраціць. Да народу і галасавання гэта не мае ніякага дачынення. І дзеля чаго ладзіць Белтэлерадыёкампаніі гэтае шоў, я не разумею.

"У Brutto значна больш шанцаў выйграць нацыянальны адбор, чым у большасці цяперашніх прэтэндэнтаў"

Алейнікаў: У Brutto значна больш шанцаў выйграць нацыянальны адбор, чым у большасці цяперашніх прэтэндэнтаў. Таму што гэта жывая і сапраўдная энергія, гэта чытаецца. Ёсць, напэўна, пытанне да песні, але для мяне Brutto — гэта нешта рэальнае, на "Еўрабачанні" я ўяўляю сабе гэты гурт. Патэнцыйна яны маглі б перамагчы і на самім конкурсе, таму што ёсць велічыня асобы.

Маліноўскі: Тут я з Максам абсалютна згодны. Ідэя класная, глядзяцца выдатна, патрэбная песня. Таму што да таго, што яны спяваюць цяпер, ёсць пытанні, вядома.