Праўладны спявак сам захацеў, каб яго песня гучала ў прыбіральні

Праўладны спявак Іван Зданюк расказаў у сацсетках, як дамовіўся на гранне сваёй песні ў прыбіральні.

Артыст выступаў на "Марафонах адзінства", арганізаваных уладай напярэдадні сёлетніх "выбараў".

Нядаўна Зданюк зайшоў у прыбіральню мінскай кавярні "Варка". там яго ўразіла вялікая чырвоная кнопка на сцяне, а побач — надпіс "Націсні мяне".

"Вы б націснулі? Сумнеўна неяк гучыць. І ў прынцыпе ты звычайна не націскаеш на чырвоныя кнопкі — толькі ў экстранных выпадках. Раптам гэта нейкая падстава", — падзяліўся Зданюк сваімі сумневамі. аднак ён усё ж націснуў кнопку — святло ў прыбіральні адразу вымкнулася, уключылася светламузыка і загучала вірусная песня Pedro.

Артысту спадабалася ідэя музычнай прыбіральні, але не вельмі спадабаўся рэпертуар. Разам з фіналісткай шоу БТ "Фактар.бай" Алёнай Тоўсцік ён пайшоў да кіраўніцтва "Варкі". Артысты дамовіліся, каб у прыбіральні грала "правільная музыка", а менавіта — іх сумесны новы трэк "Пачуцці".