Расія наракае на "грубы інфармацыйны ўкід"
Амбасада Расіі ў Беларусі выказала здзіўленне з нагоды заявы МУС РБ аб дэталях крымінальнай справы ў дачыненні да расіянаў Арцёма Брэуса ды Івана Гапонава.
Гаворка ідзе пра апублікаваную 15 лютага заяву МУС, у якой гаварылася пра існаванне доказаў віны расіянаў.
Дыппрадстаўніцтва адзначае, што "грубы інфармацыйны ўкід па дэлікатным для нас пытанні" адбыўся пасля перадачы справы Брэуса і Гапонава ў суд. У той час, як Расія захоўвала "рэжым цішыні", каб пазбегнуць абвінавачанняў ў ціску на суд.
У заяве амбасады падкрэсліваецца, што абвінавачаныя ў спрычыннасці да масавых беспарадкаў расіяне абвяргаюць свій актыўны ўдзел у падзеях 19 снежня. Таксама паказваецца, што даказана толькі сама прысутнасць Гапонава і Брэуса на мітынгу, за што яны ўжо панеслі адміністрацыйнае пакаранне, паведамляе РІА Новости.
