На Гомельшчыне буракі cкладуць у бомбасховішчы
Улады вобласці мяркуюць, што на сёння бракуе сховішчаў гародніны, каб рабіць запасы ўласнай сельскагаспадарчай прадукцыі.
Як паведаміў журналістам 27 чэрвеня старшыня Гомельскага аблвыканкаму Ўладзімір Дворнік, блізу кожнага буйнога горада ёсць бомбасховішчы. Іх пабудавалі ў савецкія часы і цяпер не выкарыстоўваюць паводле прызначэння. Але ж гэтыя памяшканні можна прыстасаваць як сховішчы гародніны.
Са словаў спадара Дворніка, у Беларусі недастаткова назапашваюць уласнай бульбы, цыбулі і буракоў, таму гэтую прадукцыю вязуць з-за мяжы. Так, у Гомельскай вобласці аб’ём вытворчасці гародніны сягае 120 тысяч тон на год. А сховішчы разлічаныя толькі на 30-35 тысяч тон. Таму і разглядаецца магчымасць выкарыстання старых бомбасховішчаў, паведамляе БелаПАН.
