Самае цяжкае ў індустрыі — туды трапіць. Беларус стварыў свет S.T.A.L.K.E.R. 2 | Навіны Беларусі

Сярод гульняў адным з галоўных хітоў канца 2024-га стала S.T.A.L.K.E.R. 2 ад украінскай студыі GSC Game World. Руку да яе стварэння прыклаў і беларускі гейм-дызайнер і арт-мастак Дзмітрый Аношка.

Еўрарадыё паразмаўляла са Дзмітрыем пра прафесію, працу ва ўкраінскай кампаніі падчас вайны і пасхалкі для беларусаў у міжнародным хіце.

Ад камп'ютарных клубаў — да працы над гульнямі

Дзмітрыю 34 гады, ён нарадзіўся ў Гомелі, скончыў школу з архітэктурна-мастацкім ухілам, потым паступіў у БДЭУ. У гульнявую індустрыю прыйшоў амаль у 30 гадоў.

— Да гэтага я спрабаваў сябе ў розных сферах: ад вытворчасці вырабаў са скуры да гандлю на біржы. Перыядычна гэта давала вынікі, але ненадоўга. У нейкі момант я захапіўся інтэр'ернай візуалізацыяй, атрымаў мінімальныя веды для ўваходу індустрыю. Потым прайшоў курс па лэвэл-арце [стварэнне "ўзроўняў" у гульнях] у Unreal Engine, паралельна зрабіў партфоліа і атрымаў запрашэнне на працу ў Кіеве.

Паводле Дзмітрыя, гульнямі ён захапіўся ў дзяцінстве — у перыяд буму камп'ютарных клубаў. Асабліва яму падабаліся розныя лакацыі.

“Самое сложное в индустрии — туда попасть”. Белорус создал мир S.T.A.L.K.E.R. 2

Скрыншот з гульні "Сталкер 2"

— Усё жыццё я надаю ўвагу асяроддзю, міжвольна прыкмячаю розныя дробязі. Напрыклад, як патрэсканы асфальт, як з яго расце трава, як выглядаюць дамы, як раскіданае смецце ля кантэйнера, якая планіроўка ля месца, у якім я знаходжуся ўпершыню. Я нават у рэдактарах рабіў нейкія гульнявыя карты для Warcraft 3. Можна сказаць, гэта быў мой першы досвед лэвэл-артыста і лэвэл-дызайнера.

А крыху пазней Дзмітрый наткнуўся ў YouTube на ролікі з тэматыкай level art і зразумеў, што хоча займацца менавіта гэтым.

Працаваць над "Сталкерам" было марай

Дзмітрый прызнаецца, што працаваць над S.T.A.L.K.E.R. 2 было яго галоўнай мэтай і марай, але было адчуванне, што трапіць у кампанію проста немагчыма.

— Самае складанае ў індустрыі — туды трапіць. Я даслаў сваё рэзюмэ ў GSC, рабіў праекты ў партфоліа ў стылістыцы S.T.A.L.K.E.R. 2, але так і не атрымаў запрашэння на працу. Потым я ўладкаваўся ва ўкраінскую студыю, мне пачалі прыходзіць запрашэнні з іншых кампаній, і адной з іх была GSC. Адразу мне здалося няправільным сыходзіць з кіеўскай студыі, у якой я тады працаваў. Але праз год я ўсё ж перайшоў у GSC.

Пра працу лэвэл-артыстаў

Задача лэвэл-артыста заключаецца ў тым, каб ператварыць узровень, які складаецца з асобных дэталяў, у прыгожы і візуальна цікавы свет, кажа Дзмітрый. Пры гэтым важна ўлічваць нюансы геймплэйнага і тэхнічнага характару.

Прыклад працы Дзмітрыя

— Напрыклад, вёска, дзе жылі мае бабуля і дзядуля, была выселеная, а дамы, якія набралі радыяцыі, былі закапаныя пад зямлю. Мая мама працавала ў лабараторыі, у якой вымяралі радыяцыю ў прадуктах харчавання. Для нас было нормай пытаць, адкуль грыбы або мяса перад тым, як іх купіць.

Таму так, беларускае паходжанне, безумоўна, станоўча ўплывае на маю працу — я раблю не проста абстрактны гульнявы свет, а тое, што мяне атачала з дзяцінства.

Пра "пасхалачкі" для беларусаў

Пасля рэлізу карыстальнікі заўважылі, што ў гульню дадалі песню пра Лукашэнку. Аднак іншых беларускіх "пасхалак" у S.T.A.L.K.E.R. 2 не было.

— Важна разумець, што гэта ўкраінскі праект, таму большасць адсылак адносіцца або да ўкраінскай, або да агульнасусветнай культуры.

Галоўны пасыл гульні — паказаць свету ўкраінскую культуру. Хоць беларуская і ўкраінская культуры цесна звязаныя, было б няправільна казаць, што беларуская культура мела ўплыў на праект.

Пра працу ва ўкраінскай камандзе

Працаваць ва ўкраінскай камандзе Дзмітрыю падабаецца. Многія з яго калег сталі для яго добрымі сябрамі, таму праблем у камунікацыі не ўзнікае.

— Мой бацька — украінец, і я практычна кожнае лета праводзіў ва Украіне, убіраў яе культуру нароўні з беларускай. З дзяцінства ў мяне было абвостранае пачуццё справядлівасці — я ніколі не маўчаў, калі быў з чымсьці не згодны. І тое самае я знайшоў у многіх украінцах.

Скрыншот з гульні

Нават нягледзячы на доўгае чаканне і вайну ва Украіне, гульня зрабіла фурор. Цяпер у GSC ідзе праца над першым дадаткам, а Дзмітрый стане арт-дырэктарам гэтага праекта.

— Планую зрабіць наша DLC максімальна цікавым з пункту гледжання арту. Я хачу даць нашым гульцам нешта новае, чаго не было ў асноўнай версіі гульні. У нас вялікія планы і шмат працы, але мы моцная і дасведчаная каманда, якая ўжо даказала, што здольная спраўляцца з любымі задачамі ў самых складаных жыццёвых умовах.

Што такое S.T.A.L.K.E.R. 2?

Гэта камп'ютарная гульня ў жанры шутара ад першай асобы з адкрытым светам, распрацаваная ўкраінскай кампаніяй GSC Game World.

Дзеянне гульні адбываецца ў постапакаліптычнай зоне вакол Чарнобыльскай АЭС.

Гульня была анансаваная яшчэ ў 2010 годзе і мусіла выйсці ў 2012 годзе, але першапачатковы праект быў адменены. У 2018 годзе GSC Game World абвясціла пра аднаўленне распрацоўкі. Выхад гульні адбыўся 20 лістапада 2024 года.