Швейцарыя падтрымала сектаральныя эканамічныя санкцыі ЕС супраць уладаў Беларусі

Швейцарыя "глыбока занепакоеная няўхільным пагаршэннем сітуацыі з правамі чалавека" ў нашай краіне і "адсутнасцю дыялогу паміж урадам і грамадзянскай супольнасцю". Улады Швейцарыі заклікаюць афіцыйны Мінск выконваць свае міжнародныя абавязацельствы ў галіне правоў чалавека, вызваліць палітвязняў і адвольна затрыманых асоб, расследаваць выпадкі катаванняў або жорсткага абыходжання з затрыманымі з боку сілавікоў.

У пачатку ліпеня Швейцарыя далучылася да 4-га пакета санкцый ЕС супраць уладаў Беларусі.

У Беларусі дагэтуль за кратамі знаходзіцца грамадзянка Швейцарыі Наталля Хершэ. Яна асуджаная на два гады калоніі за тое, што сарвала балаклаву з сілавіка падчас жаночага маршу ў Мінску восенню 2020-га. Хершэ прызнана палітзняволенай.