Стала вядома, за што праваабаронцу Насту Лойка трымалі на марозе некалькі гадзін

Стала вядома, за што праваабаронцу Насту Лойка на Акрэсціна выводзілі без вопраткі ва ўнутраны дворык на некалькі гадзін. Пра гэта праваабаронцам распавяла адна з былых арыштантак Акрэсціна.

Як распавядала Еўрарадыё, на адным з судоў Лойка паведаміла, што супрацоўнік ЦІП вывеў яе ва ўнутраны двор і пакінуў без вопраткі на некалькі гадзін. Пасля гэтага яна захварэла.

"Насту аднойчы выгналі ў дворык за тое, што яна напісала скаргу на тое, што тых, хто ездзіў на працу на сметнік, доўга трымалі ў дворыку на марозе, то бок трымалі ў неналежных умовах. На гэта міліцыянт Цішачкін сказаў, што яна цяпер пойдзе і паглядзіць сама, як гэта. Яе адправілі на 5-6 гадзін у гэты дворык. Ён прасіў потым Насту, каб яна не пісала скаргі", — перадае "Вясна" словы былой арыштанткі Акрэсціна.

Таксама яна распавяла, што Лойка хацела абвясціць галадоўку, але ёй не далі паперу і асадку, каб напісаць заяву.

Насту Лойка затрымалі па адміністрацыйнай справе, але на мінулым тыдні на яе пачалі крымінальную справу і перавялі ў СІЗА. Яе вінавацяць па двух артыкулах. Вядома, што адзін з іх — дзеянні, якія груба парушаюць грамадскі парадак (арт. 342 КК).