У Чашніцкім раёне на пажары загінуў мужчына
Пажар у пасёлку Кастрычніцкі Чашніцкага раёна 7 чэрвеня завяршыўся трагедыяй, паведамляе прэс-служба Міністэрства па надзвычайных сітуацыях.
Каля 4.30 раніцы ратавальнікі атрымалі паведамленне, што гарыць кватэра па вуліцы Міра. На месцы здарэння яны пабачылі, што моцны дым ідзе з дзвюх кватэраў на другім паверсе цаглянага двухпавярховага шматкватэрнага дома.
Супрацоўнікі МНС вынеслі гаспадара кватэры, у якой пачаўся пажар, у непрытомным стане і перадалі брыгадзе хуткай дапамогі. Аднак праз нейкі час фельчар канстатавала смерць 72-гадовага пенсіянера.
З другой кватэры супрацоўнікі МНС выратавалі з гаўбца пры дапамозе лесвіцы 57-гадовую жанчыну і 59-гадовага мужчыну. З кватэраў першага паверху эвакуявалі пяць чалавек. Ніхто з выратаваных не пацярпеў.
