У Латвіі могуць адмовіцца ад рускай мовы — як другой замежнай у школе

23 красавіка ўрад Латвіі можа прыняць рашэнне аб паступовай адмове ад рускай мовы як другой замежнай у школе, піша Delfi.

На дадзены момант першай замежнай мовай у латвійскіх школах з'яўляецца англійская — яе вучаць з 1-га класа. Другую замежную пачынаюць вучыць з канца пачатковай школы. Як піша выданне, дзеці могуць выбраць нямецкую, французскую ці любую іншую мову, але часцей за ўсё выкладаецца руская, паколькі ў школах не хапае настаўнікаў іншых моў.

У выніку руская мова вывучаецца як другая замежная амаль у палове латвійскіх школ. У некаторых навучальных установах альтэрнатывы ёй не прапануецца.

Таму Міністэрства адукацыі і навукі Латвіі хоча, каб з 2026/2027 навучальнага года школы паступова пачалі прапаноўваць вучням у якасці другой замежнай мовы адну з афіцыйных моў Еўрапейскага саюза або краін-членаў Еўрапейскай эканамічнай зоны. Ці замежную мову, якая рэгулюецца міжурадавымі пагадненнямі. Руская мова не ўваходзіць у гэтыя мовы.

Падчас публічных абмеркаванняў план Мінадукацыі быў раскрытыкаваны прыватнымі асобамі — ведамства атрымала больш за 300 зваротаў, накіраваных супраць новаўвядзення. Маўляў, дзеці не павінны быць абмежаваныя ў вывучэнні роднай мовы і павінны самі вырашаць, якую мову ім вывучаць, а прапанова міністэрства выглядае палітычна матываванай.

15 лютага Канстытуцыйны суд абавязаў грамадзян Расіі, якія пражываюць у Латвіі, здаваць іспыт на веданне латвійскай мовы.