Законы ў Беларусі будуць пісаць з дапамогай штучнага інтэлекту

Штучны інтэлект (ШІ) будуць выкарыстоўваць пры напісанні законаў у Беларусі. Пра гэта заяўляе намесніца кіраўніка Адміністрацыі Лукашэнкі Вольга Чупрыс.

Паводле яе, ШІ дапаможа сістэматызаваць дакументы, а пры распрацоўцы новага акта — вызначыць, ці не дублюе ён ужо выдадзеныя дакументы.

Таксама, кажа Чупрыс, штучны інтэлект падкажа, ці трэба ўвогуле прымаць той ці іншы акт, "бо многія пытанні ўжо вырашаныя". Чыноўніца дадае, што алгарытмы і пытанні для штучнага інтэлекту яшчэ трэба прыдумаць. А далей ён ужо, маўляў, дапаможа "спрашчаць нарматворчасць і павышаць якасць нарматыўна-прававых актаў".

Чупрыс кажа, што Лукашэнка падтрымаў ідэю ўключэння штучнага інтэлекту ў аўтаматызаваную нарматыўную сістэму (АІС) "Нарматворчасць", якую ўкарэняць ужо. Задачу даручылі Нацыянальнаму цэнтру заканадаўства і прававой інфармацыі.