Затапіла дом ці звалілася дрэва? Як атрымаць кампенсацыю за шкоду ад непагадзі

23/07/2024 - 11:02

Ці можна дабіцца кампенсацыі ад уладаў? / t.me/kalinkovichi_news_official

Ураганы і залевы, якія накрылі Беларусь на мінулым тыдні, здаецца, адступілі. А іх наступствы ўлады і простыя беларусы разграбаюць дагэтуль.

Што рабіць, калі ваш дом затапіла, а ў ім былі дарагія рэчы, ці, напрыклад, на вашу машыну звалілася дрэва? Ці можна атрымаць кампенсацыю за нанесеную стыхіяй шкоду? Еўрарадыё спытала юрыстку і звязалася з мясцовымі ўладамі.

Звярнуцца ў "Белдзяржстрах" і камісію па НС пры выканкаме

Пад выглядам мясцовага жыхара, у якога затапіла дом, мы звярнуліся ў Нараўлянскі райвыканкам (гэты раён — адзін з самых пацярпелых падчас урагану) і даведаліся, ці можна атрымаць кампенсацыю за нанесеную шкоду.

Перш чым даць нам кансультацыю, працаўніца прыёмнага пакоя папрасіла назваць імя, прозвішча, імя па бацьку і адрас затопленага дома.

— Цалкам, калі ласка, я запісваю. Я мушу ведаць канкрэтна, хто да нас звярнуўся, каб мы паглядзелі, ацанілі, выехалі... Ну, калі вы не хочаце мне казаць, звярніцеся ў "Белдзяржстрах".

— І што яны мне скажуць? — пытаем яе.

— Спачатку вы звернецеся ў "Белдзяржстрах", потым яны паглядзяць памер шкоды, і адсюль ужо будзем скакаць. Яшчэ залежыць ад таго, якая менавіта ў вас страхоўка. Напрыклад, па абавязковай страхоўцы аплачваецца толькі 50% шкоды, калі нейкая даражэйшая, то яны будуць праводзіць ацэнку і скажуць, што ў вашым выпадку рабіць. Можа, вам пры выканкаме трэба будзе звярнуцца ў камісію па надзвычайных сітуацыях. Я ж вам кажу, давайце ваш адрас і неяк вырашаць.

— А гэта доўгі працэс?

— Ну вядома, любая страхавая выплата — гэта не праз дзень-два, яны разглядаюць справу доўга. Калі гэта сапраўды будзе страхавы выпадак у сувязі з надзвычайнай сітуацыяй, то ўсё гэта будзе разглядацца яшчэ і ў камісіі па НС. Але вам давядзецца прыйсці да нас і напісаць заяву.

Пасля прыроднай стыхіі вельмі складана даказваць чыю-небудзь віну

Паводле юрысткі, якая паразмаўляла з Еўрарадыё на ўмовах ананімнасці, уладальнікі прыватных дамоў маюць дамову абавязковага страхавання ў "Белдзяржстраху". Таму ў выпадку, калі знесла дах ці падтапіла падвал, неабходна звяртацца па страхавую кампенсацыю.

— Іншыя гаспадарчыя пабудовы таксама ўваходзяць у склад домаўладання, і за шкоду, нанесеную ім, можна будзе атрымаць кампенсацыю. Разам з тым, паводле дамовы абавязковага страхавання не ўсе выпадкі — страхавыя. Каб пазбегнуць такіх праблем у будучыні, мэтазгодна застрахаваць сваю маёмасць.

Паводле юрысткі, у выпадку пашкоджання маёмасці пасля стыхіі вельмі складана даказваць чыю-небудзь віну.

— Напрыклад, калі на прыпаркаваную машыну звалілася дрэва падчас урагану. Кампенсацыя ад страхавой кампаніі магчымая, калі была страхоўка КАСКО (добраахвотнае страхаванне). Калі была абавязковая дамова страхавання грамадзянскай адказнасці, то яна распаўсюджваецца толькі на выпадкі ДТЗ.

Прэтэнзіі да мясцовых уладаў можна заявіць, калі даказаць, што паваленае дрэва патрабавала спілоўвання, было старым і менавіта праз гэта не вытрымала ўрагану і звалілася. Але каб гэта даказаць, трэба звярнуцца да спецыяліста (у экспертную ўстанову) у гэтай галіне, даць яму ўзор і атрымаць яго заключэнне. За даследаванне давядзецца заплаціць. З такім заключэннем можна фармуляваць іскавыя патрабаванні і звяртацца ў суд.

У выпадку, калі дрэва ўпала на плот дома, важна разумець, на чыёй тэрыторыі яно размяшчалася, кажа экспертка. Калі гэта прыватная тэрыторыя, то ўласнік сам мусіць сачыць за станам сваіх дрэў.

— Ну а калі машыну падтапіла, то тут вельмі складана камусьці выставіць прэтэнзіі. Трэба высвятляць прычыны, чаму ліўневая ці дрэнажная сістэма не справілася з такім патокам вады. Для гэтага таксама спатрэбіцца экспертнае заключэнне.

***

Прэс-служба Гомельскага аблвыканкама паведаміла, што за тры дні пасля ўрагану "Белдзяржстрах" выплаціў каля 390 тыс. рублёў пацярпелым ад непагадзі.

Колькасць заяваў пра кампенсацыю за нанесеную шкоду перавысіла 7500. Заявы "паступаюць, але іх паток знізіўся".