ЗША гатовыя мяняць пазіцыю па візах для беларусаў
![Беларусы ў Вашынгтоне](/sites/default/files/styles/gallery_main/public/2023-12/12667.jpg.webp?itok=aAGAj9ht)
Беларусы ў Вашынгтоне / t.me/tsikhanouskaya/
Дарадца кіраўніцы Аб'яднанага пераходнага кабінета Беларусі Святланы Ціханоўскай Франак Вячорка расказаў пра вынікі стратэгічнага дыялогу паміж ЗША і беларускімі дэмакратычнымі сіламі, які праходзіў у Вашынгтоне. Найперш ён падкрэсліў унікальнасць самой падзеі. "Раней Злучаныя Штаты ніколі не ладзілі стратэгічны дыялог не з урадам", — кажа Вячорка. Таксама ён адзначыў, што дэмсілы здолелі не толькі сесці за стол перамоваў з уплывовымі амерыканскімі палітыкамі, але і дасягнуць важных дамоваў. Асноўнае — гэта стварэнне працоўных групаў па чатырох напрамках: палітвязні і прыцягненне рэжыму да адказнасці, дапамога прыватнаму сектару, культурным ініцыятывам, моладзі і беларускім дыяспарам. Гэтыя групы будуць збірацца і працаваць на рэгулярнай аснове.
"Я бачу пазітыў, што амерыканцы гатовыя мяняць пазіцыю па візах... Здаецца, ёсць гатоўнасць... пачаць выдаваць больш доўгія візы. Бо я не разумею, чаму расіянам выдаюць на тры гады візы, а беларусам — на адзін год. І гэта быў бы такі магутны сігнал салідарнасці", — працягвае Франак Вячорка.
Таксама дасягнута папярэдняя згода на прызначэнне спецпасланніка для працы з дэмакратычнай Беларуссю. На разгляд у Кангрэс ЗША пададзены Belarus Democracy Act 2023 — новая версія законапраекта, які падтрымлівае дэмакратычную Беларусь. Яго павінны прыняць да канца 2023 года. Будзе разглядацца магчымасць надання статусу часовай аховы для беларусаў ЗША.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.