Байца палка Каліноўскага з пазыўным "Бахус" пахаваюць ва Украіне
Беларуса пахаваюць на Алеі славы ў Каламыі / facebook.com/b.stanislavskyi
Заўтра ў горадзе Каламыя — гэта ў Івана-Франкоўскай вобласці Украіны — адбудзецца пахаванне байца палка імя Кастуся Каліноўскага з пазыўным "Бахус". Пра гэта паведаміў у сацсетках мэр горада Багдан Станіслаўскі.
Ён расказаў, што беларускі добраахвотнік загінуў 7 кастрычніка. "Для нас смерць кожнага абаронцы Украіны — вялікі боль. Таму ад імя Каламыйскай грамады выказваю спачуванні родным і блізкім з гэтай цяжкай стратай", — сказаў мэр горада. Ён таксама адзначыў, што беларускага добраахвотніка пахаваюць на Алеі славы ў Каламыі. Заўтра ў грамадзе аб'яўлены дзень жалобы.
Дзе загінуў "Бахус", Станіслаўскі не ўдакладніў. Аднак раней паведамлялася, што ў ноч на 7 кастрычніка два беларускія добраахвотнікі загінулі пад Бахмутам. Каля машыны, у якой яны ехалі, разарваўся снарад.
