Ціханоўская выказалася пра сітуацыю з Карач
Вольга Карач / Еўрарадыё
Кіраўніца Аб'яднанага пераходнага кабінета Беларусі Святлана Ціханоўская выказалася пра скандальную сітуацыю з Вольгай Карач. Палітычнай актывістцы адмовілі ў міжнароднай абароне ў Літве і назвалі "пагрозай нацыянальнай бяспецы".
"Я ніколі не працавала з Вольгай Карач, мы ніколі не размаўлялі, — цытуе словы Ціханоўскай lrt.lt. — Таму я не ведаю ўсіх падрабязнасцяў гэтай сітуацыі, але ў мяне няма падстаў не давяраць літоўскім інстытутам... Я ведаю, што яна даволі негатыўна да мяне ставіцца, але няма прычын, каб усе мяне любілі".
Вольга Карач — кіраўніца Цэнтра грамадзянскіх ініцыятыў "Наш дом", які ў Беларусі абвешчаны "экстрэмісцкім фармаваннем". Каля дзесяцігоддзя яна жыве ў Літве. У літоўскіх СМІ днямі з'явіліся публікацыі пра тое, што беларуску могуць падазраваць у супрацоўніцтве з расійскай разведкай. Карач гэта абвяргае.
