ДАІ прапануе падзяліць ап'яненне кіроўцаў па ступенях

Дзяржаўтаінспекцыя прапануе ўвесці падзел ступеняў ап'янення кіроўцаў у Беларусі. Гэта дасць магчымасць па-рознаму караць парушальнікаў ПДР, лічыць начальнік УДАІ МУС Дзмітрый Карзюк.

У эфіры АНТ ён растлумачыў: з 0,3 праміле алкаголю ў крыві можна караць штрафам у 100 базавых велічынь (адна БВ — 25,5 рублёў) і пазбаўленнем правоў на тры гады. Наступная градацыя алкагольнага ап'янення — 0,8 праміле. Пасля 0,8 у ДАІ прапануюць пакаранне ў выглядзе 200 базавых і пазбаўленне права кіравання тэрмінам на 5 гадоў.

Па словах Дзмітрыя Карзюка, піша БЕЛТА, праўкі ў заканадаўства ўжо ўзгодненыя з усімі зацікаўленымі. Іх падтрымалі.

У цяперашні час ч.1 арт.18.16 КаАП за нецвярозае кіраванне або адмову ад праходжання агляду прадугледжаны штраф ад 50 да 100 базавых велічынь з пазбаўленнем права кіравання транспартнымі сродкамі тэрмінам на тры гады. У выпадку, калі кіроўца трапляецца п'яным другі раз на працягу года, гэта цягне канфіскацыю машыны, а таксама крымінальную адказнасць.