Дэпутатаў просяць не забараняць рэкламу ў паштовых скрынях

imosrentgen.ru

Выканаўчы дырэктар Асацыяцыі рэкламных арганізацый Валерый Бондар выступіў супраць забароны на рэкламныя ўлёткі ў паштовых скрынях, якую рыхтуецца ўвесці Палата прадстаўнікоў. "Ініцыятыва парламентарыяў не зусім зразумелая. З аднаго боку, некаторым людзям можа быць нязручна, што ў паштовай скрыні, акрамя лістоў і квітанцый, ляжаць рэкламныя ўлёткі. З іншага, такія ўлёткі — гэта самы даступны для малога бізнесу від распаўсюду рэкламы", — распавёў Бондар у інтэрв'ю газеце "Беларусы і Рынак".

Ён тлумачыць, што прадстаўнікі малога і сярэдняга бізнесу не маюць сур'ёзных бюджэтаў, каб купляць рэкламу на радыё і тэлебачанні. Забарона на ўлёткі ў паштовых скрынях адаб'ецца на дзелавой актыўнасці і даходах гэтых прадпрымальнікаў.

"Ніякай шкоды дзяржаве ад рэкламных улётак у паштовых скрынях няма. Ёсць толькі прыбытак. Людзі заробяць грошы і выплацяць падаткі ў бюджэт. А калі вы раптам знайшлі сярод лістоў і газет рэкламную ўлётку і гэта вас раздражняе, то проста выкіньце яе ў смеццевы бак з надпісам "Папера". Гэта амаль тое самае, што пераключыцца з дапамогай пульта на іншы тэлеканал падчас рэкламнага блока", — лічыць дырэктар Асацыяцыі рэкламных арганізацый.

Тыдзень таму намеснік старшыні пастаяннай камісіі па працы і сацыяльных пытаннях Палаты прадстаўнікоў Алег Леўшуноў распавёў, што ў Беларусі рыхтуюцца папраўкі ў законы па пытаннях рэкламы. Сярод іншага плануецца забараніць кідаць рэкламныя ўлёткі ў паштовыя скрыні, калі жыхары дома не дадуць на гэта згоды.