Гомельская міліцыя падстрэліла "выратавальніка Сусвету" пад кайфам (відэа)

31-гадовага гамельчука затрымалі на тэрыторыі аднаго з праваслаўных храмаў горада. Мужчына бегаў з нажом у адной руцэ і уключаным ліхтаром у другой, перадае interfax.by.

Міліцыянтаў выклікала прыхаджанка храма. На патрабаванне праваахоўнікаў здаць зброю, гамяльчук адрэагаваў агрэсіўна. Пра падрабязнасці распавёў міліцыянт-кіроўца Чыгуначнага аддзела Гомельскага абласнога ўпраўлення Дэпартамента аховы Уладзімір Васькоў:

Васькоў: "Цёмна было, падышоў мужчына, адзенне ў яго было незразумелае — быццам у прасціну укручаны. Ён свяціў ліхтарыкам мне проста ў твар і чытаў нейкія заклінанні".

Выявілася, што мужчына пад уздзеяннем наркотыкаў укруціўся ў покрыва і ўявіў сябе кінагероем з фільма Марціна Кэмпбэла "Зялёны ліхтар". Пасля гэтага ён пайшоў "ратаваць Сусвет" ад злачынцаў.

Міліцыянтаў ён прыняў за ворагаў і пабег на іх з нажом. Паведамляецца, што праваахоўнікі зрабілі некалькі папераджальных стрэлаў у паветра, а потым — у мужчыну. Яго паранілі ў нагу і шпіталізавалі.

Цяпер на гамельчука пачалі крымінальную справу за пагрозу міліцыянтам. Яму пагражае да пяці гадоў пазбаўлення волі.