Крысціна Ціманоўская атрымала грамадзянства Польшчы
Крысціна Ціманоўская атрымала грамадзянства Польшчы. "Так цяжка было пра гэта маўчаць больш за месяц. Але цяпер ужо і сэнсу няма", — напісала спартсменка ў Instagram.
Нядаўна Ціманоўская заняла другое месца ў камандным першынстве Польшчы па лёгкай атлетыцы. Яшчэ ў пачатку чэрвеня яна перажывала, што якраз з-за адсутнасці польскага грамадзянства не можа ўдзельнічаць у чэмпіянаце Польшчы. Аднак у канцы чэрвеня атрымала пашпарт.
Летась на Алімпіядзе ў Токіа беларуская лёгкаатлетка Крысціна Ціманаўская ў сацсетках абурылася тым, што яе паставілі бегчы іншую дыстанцыю. Кіраўніцтва каманды, спрабуючы замяць скандал, хацела сілай адправіць спартсменку ў Беларусь. Аднак яна звярнулася за дапамогай да японскай паліцыі і міжнароднай супольнасці. У выніку Ціманоўская апынулася ў Польшчы. Пра яе паведамілі ўсе найбуйнейшыя СМІ свету.
