Ксяндза Анджэя Юхневіча пераводзяць у следчы ізалятар
Анджэй Юхневіч / shaltnotkill.info
Ксяндза Анджэя Юхневіча пераводзяць з ізалятара часовага ўтрымання ў следчы ізалятар. Гэта азначае, што супраць святара распачаты крымінальны пераслед. Дагэтуль невядома, што менавіта яму інкрымінуецца, піша @christianvision.
Ксяндза з Шуміліна на Віцебшчыне затрымалі 8 траўня (разам з ім затрымлівалі ксяндза Паўла Лемеха). Яго прыцягнулі да адміністрацыйнай адказнасці за размяшчэнне ў Facebook выявы бел-чырвонага-белага і ўкраінскага сцягоў. Юхневіча арыштавалі на 15 сутак і з таго часу на волю ён так і не выйшаў — арышт працягвалі.
У чэрвені беларускія праваабаронцы прызналі ксяндза Анджэя Юхневіча палітычным зняволеным.
