Макей пра перамовы па інтэграцыі з Расіяй: прыйдзе час — і ўсе ўсё даведаюцца
![Макей пра перамовы па інтэграцыі з Расіяй: прыйдзе час — і ўсе ўсё даведаюцца](/sites/default/files/styles/gallery_main/public/2023-08/makiej-0406-2.jpg.webp?itok=QqZu_Aat)
Беларусь і Расія працягваюць перамовы наконт магчымасцяў далейшай інтэграцыі паміж краінамі. Пра гэта міністр замежных спраў Беларусі Уладзімір Макей паведаміў журналістам у кулуарах канферэнцыі "10 гадоў "Усходняму партнёрству": вынікі і перспектывы".
"Мы сапраўды вядзём гутарку з нашымі расійскімі партнёрамі адносна таго, у якіх сферах мы маглі б працаваць больш эфектыўна разам і якія кірункі нашай інтэграцыі маглі б даць дадатковыя дывідэнды для развіцця нашых дзвюх краін", — патлумачыў дыпламат.
Разам з тым ён адмовіўся ўдакладняць якія-небудзь дэталі гэтых перамоваў: "Прыйдзе час — і ўсе пра ўсё даведаюцца".
На пытанне, ці ёсць у гэтых перамовах патрабаванне абмежаваць беларускі суверэнітэт, Макей параіў вывучаць прамовы Аляксандра Лукашэнкі, які выказваўся на гэты конт.
Нагадаем, што падчас Паслання народу і Парламенту 19 красавіка 2019 года кіраўнік дзяржавы заявіў: "І той, хто сёння асмеліцца знішчыць Беларусь, сам па сабе — прэзідэнт, урад, яшчэ... — яны будуць праклятыя нашым беларускім народам. А хто асмеліцца гэта зрабіць сілай, яны атрымаюць наймагутны адказ ад нашага народа і перш за ўсё ад тых, хто нарадзіўся суверэнным і незалежным. Вось вам адказ на гэтае пытанне, калі хтосьці гэтага не разумее".