Мінтранс пацвярджае: "Белаэранавігацыю" могуць адключыць ад агульнай сістэмы
Дыспетчарская ў мінскім аэрапорце
Рызыка адключэння "Белаэранавігацыі" ад еўрапейскай базы звестак аб паветраным руху ёсць, пацвердзіў дырэктар дэпартамента авіяцыі Мінтранса Арцём Сікорскі, паведамляе reform.by.
"У цяперашні час такая праблема існуе", — сказаў ён.
Па словах Сікорскага, "еўрапейскія партнёры тлумачаць, што гэтая палітычная каманда паступіла. Яна ніяк не звязаная з пытаннямі нашага ўзаемадзеяння". Беларускі чыноўнік лічыць, што такім чынам авіяцыю спрабуюць выкарыстоўваць "для нядобрасумленнай канкурэнцыі", як "інструмент аказання ціску".
Нагадаем, "Белаэранавігацыя" знаходзіцца пад санкцыямі ЕС пасля інцыдэнту з рэйсам Ryanair. Прадпрыемства спрабуе аспрэчыць санкцыі ў судзе Еўрасаюза.
Сікорскі таксама расказаў, што ў выпадку новых санкцый, у прыватнасці забароны лізінгу амерыканскіх бартоў Boeing, "Белавія" можа перайсці на расійскія самалёты.
Пра тое, што міжнародная арганізацыя грамадзянскай авіяцыі (ICAO) можа ўвесці санкцыі супраць Беларусі праз сітуацыю з самалётам Ryanair, паведаміў на гэтым тыдні дарадца Святланы Ціханоўскай Франак Вячорка.
